WAN - Cinîyan derheqê tedayê serê Çapemenîya Azade mesajê, "Ma do pîya hemverê nê bêhuqûqiyî de têkoşîn bikerê, ma qelema heqîqtî erd de nêverdê" dayî.

 

Teda û hêrişê hukmetê AKP-MHPyî yê serê Çapemenîya Azade roj bi roje zêde benê. Netîceyê operasyonê ke 23yê Nîsane de Stenbol de ame kerdiş de 9 rojnamegerî amebî destbendkerdiş û nînan ra ra 3 rojnamegerî amebî tepiştiş. 6ê Gulane de zî çaarçewaya cipersayîşêk 2021î de hetê Serdozgerîya Komare ya Amedî ra operasyon ame destpêkerdiş û pêwa rojnamegere Derya Ûs û Nûrcan Yalçine xeylêk kesî ameyî destbendkerdiş. Kesê ke ameyî destbendkerdiş vizêr emniyet de îfadeyê înan ame girewtiş û paweyê ke ewro înan vejê vernîya serdozgerîye. 

 

'Averşîyayîşê demokrasî girêdayeyê azadîya çapemenîye yo'

 

Hemşaredara verî ya Partîya Demokratîke ya Şaran (HDP) ê Erdîşî ke qeyûm vera ci ame tayînkerdiş, Yildiz Çetîne, ard vîr ke rojê peyîn de xeylêk rojnamegerî ameyî destbendkerdiş û tepiştiş û vat, "Destbendkerdişî hemverê huquqî yo. Rojnamegerê azadî hîs û fehmê xo neql kenê û serê bingehêk rast neql kerdî destbendkerdişê înan nînê qebûlkerdiş. Seba ke demokrasî û huqûq aver şêro, ganî çapemenîye azade bo. Bêvengkerdişê çapemenîye nîno qebûlkerdiş. Rayaumûmî bi xeberanê çapemenîya azade rastiyan agahdar bena. Heqê komelî yo ke agahîyê rast bigîro est o û no heq nîno astengkerdiş."

 

'Çapemenîya Azade Kurdistan de bîya vengê şarî'

 

Hemsereka Partîya Têduştîye û Demokrasîyî yê Şaran (DEM Partî) ê Bajarê Wanî Gulşen Kurt zî dîyar kerd ke îqtîdarî AKP-MHPyî bi serran o bi hawayêkê sîstematîk şîdet, teda û tepiştişê hemverê  Çapemenîya Azade dewam kena. Gulşene dîyar kerd ke teda bi zanebîyayîş yenê kerdiş û vat, “Ganî no şîdet, tedayê serê çapemenîya azade ke vengê heqîqetî peynî bibê. Çapemenîya azade Kurdistan de bîya vengê şarî. Ganî ma sey şarê kurdî û şarê Tirkîya hemverê destbendkerdiş û tepiştişî bi taybetî yê hemverê çapemenîye vinderê. Ma venga pêro şarê Kurdistan û Tirkîya kenê ke bibê yew lez demî de peyîn rê şîdetî bivînê û qelema heqîqetî nêgêno erdî ro."

 

'Ê do nêeşkê rojnamegeran rê game peyser bidê eştiş'

 

Aktîvîsta Têgêrayîşê Cinîyê Azade (TJA) Zeynep Kaya, dîyar ke dewlete hêrişê xo yê hemverê Çapemenîya Azade her cayî de dewam kena, sey hêrişê 23ê Nîsane yê serê Medya Haber TV û Stêrk TV, Zeynepe wina vat: “Wa no bêro zanayîş ke êdî xebera şarê kurdî her çî ra est a û her çî zano. Tedayê nê hukmatî yê serê çapemenî û ciwanan do nêeşkê bi rojnamegeran game peyser bierzê eştî. Sey cinî ma do hem têkoşînê cinî hem zî têkoşînê embazanê xo yê çapemenîya azade ko bikerê û seba pîlkerdişê ci her cayî têkoşîn bikerê. Ma hêvî kenê ke pêro rayaumûmî û hêzê girseyê demokratîke wayîrê demokrasî vejîyê. Ganî ma bi temamî hemverê nê nêheqî vinderê. Ma a bawerîye de yê ke eke ma bi pîya têkoşîn bikerê, ma do nê meylê faşîst werte ra wedarnê. Bêrê ma pîya têkoşînê xo pîl bikerê.”