Mîdye Miqted

 

ŞEHBA - Cinîyê Efrînî ameyê koçberkerdiş, kantonê Şehbayî dîyar kerdî ke ê seba debara xo û pawitişê kulturê cinîya kedkar, ramitişî reyde eleqedar benê û vatî: “Ma boya xo ramitişî reyde vejenê û ma bi karê xo xeylêk şanaz ê, seba pêro tewirê hêriş û ambargoyê serê ma yeno ferzkerdiş, ma xo ver danê û cuya xo dewam kenê."

 

Bi zêdeyê 6 serrî yo ke welatijê Efrînî bi zordarî keye û herra xo ra koçberê kantonê Şehbayî bîyî. Tîya de pêwa ke rewşêk koçberî û nêasayîşî de yê, ser de zî dewleta tirkan û komê girêdayeyê aye her hêrişê xo serê welatijê Şehba û koçberê Efrînî de ameyê, danê dewamkerdiş. Sewbîna hukmatê Şamî ambargoyê xo ser de zî dano ferzkerdiş. Cinîyê kantonê Şehba-Efrînî yê ke seba dewamkerdişê xoverdayîşê xo pêro tewir kar û xebate rayîr ra benê û nika karê ramitişî reyde eleqedar ê.

 

Cinîyan dîyar kerdî ke seba debara xo bikerê û pawitişê kulturê cinîyanê kedkaran bikerê, ramitişî reyde eleqedar benê û xeylêk zehmetîyan reyde derebaz benê.

 

'Seba debara xo ma pîya kar kenê'

 

Fatme Elî Hemo derheqê karê xo yê ramitişî de da zanayîş ke ê her tim seba debara xo û kulturê xo ramitişî reyde eleqedar benê û wina vat: "Bi 6 serrî yo ma serrê herra xo ra bi darê zorî koçber bîyî. Tîya kar tay o, rewşe zehmet a, seba ma debara xo bikerê û ekonomîya xo aver berê, ma karê ramitişî kenê. Ma paleyî kenê û her tewir sebzeyan reyde eleqedar benê. Nê rayîrî ser ma feyde gênê. Seba debara keyeyî ez û mêrdeyê xo ma pîya kar kenê.”

 

Heta agêrayîşê serê herra xo kede dewam a

 

Peynîya qiseykerdişê xo de Fatme da zanayîş ke ê pêwa pêro şertê xidarî yê koçberî têkoşînê xo dewam kenê û wina vat: “Ma serê sibayî saete çarine de wurzenê û verê xo danê ramitiş. Ma roje de 6-7 saetan kar kenê. La nê ra zorê ma nêşino, semedo ke cimeatê kurdî û bi taybetî cinîya kurde demê verî de bi ramitişî reyde eleqedar bena. Heta agêra serê herra xo kede û xebata xo ma do bidê dewamkerdiş."

 

Pêwa pêro tewirê şerî xo ver danê

 

Gulê Birîmo dîyar kerd ke ê bi rayîrê ramitişî kulturê xo pawenê û wina vat: “Kantonê Şehbayî de îmkanê karî zaf tay ê. Bi taybetî seba keyeyê wayîrê tutan ê hîna kêmî yo. Ma zî sey cinî, hem seba pawitişê kultutê cinîya kedkar, hem zî seba debara xo ramitişî reyde eleqedar benê. Sewbîna ma eleqedarbîyayîşê reyde hewl danê hîn dejê koçberî serê xo ra şenik bikerê. Ma boya xo ramitişî reyde vejê û ma bi karê xo xeylêk şanaz ê, seba pêro tewirê hêriş û ambargoyê serê ma yeno ferzkerdiş, ma xo ver danê û cuya xo dewam kenê.”