Rozerîn Gultekîn

 

STENBOL - Endama YJK-Eyî Besra Uzun derheqê kampanyaya ‘CPTyî re mektube’ de qisey kerd û vat: “Ma do CPTyî rehet nêverdê. Wa nê bizanê. Azadîya serekî, azadîya merdimayî ya. Seba nê zî wa her kes vengê xo berz bikero û tewrê kampanyaye bibo.”

 

Rayberê PKKyî Abdullah Ocalan ke 25 serrî yo Zîndanê Asayîşê Berzî yê Tîpê Fyê Îmraliyî de tepişte yo, 38 aşmî yo tu agahî ci ra nîna girewtiş. Rojê vîyarte de Mudûrê Pêroyî yê Keyeyê Tevkîf û Ceza ya Wezaretê Dade cewab da muracatê derheqê tecrîdî de û îdia kerd ke ‘tepişteyê Îmraliyî heqê têduştî ra feyde gênê.’ La Dadgeriya Înfazê Bursayî 28ê Adare de bi sebebê cezaya dîsîplînî est a, hîrê aşmî cezaya pêvînayîşî da keyeyan.

 

Hemleyê "Abdullah Ocalanî rê azadî, problemê kurdî rê çareserî" yê bi amancê azadîya fîzîkî ya Abdullah Ocalanî ameya destpêkerdiş, sewîyeya diyîne de dewam kena. Çarçewaya kampanyaya ameya destpêkerdiş de Ewropa de Têgêrayîşê Cinîyanê Kurdan zî kampanyayan keno. Têgêrayîşê Cinîyanê Kurdan ê Ewropayî (TJK-E) kampanyaya "Hezar cinî, yew veng" û kampanya CPTyî rê mektube şirawitişî dayî destpêkerdiş û xebatê xo dewam kenê.

 

Endama Yewîya Cinîyanê Kurdan ê Almanyayî (YJK-E) Besra Uzun ke kampanyaye de ca gêna derheqê kampanyaye de agahî da.

 

 

‘Tecrîd babetêke asan nîya’

 

Besra reaksîyon vera îdiayê ‘tecrîd çin o’ yê Midûriyetê Pêroyî yê Keyeyê Tevkîf û Ceza ya Wezaretê Edaletî mojna  û vat: “Ma pêro zanê ke Îmraliyî de tecrîd est o. Tecrîd hem serê ma hem serê Abdullah Ocalanî de est o. No îşkence yo. Eke tecrîd çin o, çira keye û avûkatî nêeşkenê şêrê pêvînayîş bikerê. Wazenê ma pêrûne tecrîd bikerê. Şarê kurdî nê tecrîdî qebûl nêkeno.”

 

‘CPT rolê xo kay nêkeno’

 

Besra vat, CPT Tirkîya de serdayîşê zîndanan kerdo la Îmrali ziyaret nêkerdo û wina vat: “CPT wezîfeyê xo ca nêard. Nê semedî ra ma xeylêk çalakî kerdî. Seba CPT çimanê xo abikero, heyetêk awan bikero û bişirawo Îmraliyî, ma keye bi keye, taxe bi taxe gêrenê û xebata mektuban şirawenê. Heta nika ma 3 hezar û 22 îmza û mektube şirawitî. Şar eleqeyêk pîl mojneno. CPT eke vajo ez heqan pawena, ganî şarê kurdî zî bipawo. CPT rolê xo kay nêkeno. Heta serekê ma azad nêbo, ma do kuçeyan de bê. Çi destê ma ra bêro ma do bikerê.  Ma do CPTyî rehet nêverdê. Wa nê baş bizanê. Wa şarê kurdî wayîrê serekê xo bivejîyo. Wa her kes vengê xo berz bikero û tewrê kampanyaye bibo.”