Rozerîn Gultekîn

 

STENBOL - Endama Koordînasyonê Cinîyanê Ciwanan ê DEM Partîye Senem Ermîş da zanayîş ke muracatê seba Turnuvaya Futbolî yê Gulîstan Doku xeylêk zêdeyê û wina vat: “Ma amanc kenê ke hemverê sporê zîhnîyetê serdestî, rewşa dînamîkî ya ciwanan bi sporî reyde bîyarê têhet. Ma venga tewrbîyayîşê têkoşînî û vengvetişê polîtîkayê şerê taybetî  ciwanan rê kenê."

 

Meclîsê Ciwanan ê Partîya Têduştî û Demokrasîyî yê Şaran (DEM Parti), çarçewaya kampanyaya ‘hemverê şerê taybetî de têkoşînê bi heybet’ yê 5ê Tebaxa 2023ine de ameyo destpêkerdiş bi sloganê, "Hemverê polîtîkayê şerî: Pirode" turnuvayê futbolî pê ano. Turnuvaya emser seba Gulîstan Doku ya 4 serrî yo vînî ya bêro organîzekerdiş. Muracatê turnuvayî heta 21ê Gulane dewam keno.

 

Endama Koordînasyonê Cinîyanê Ciwanan ê DEM Partîye Senem Ermîş derheqê polîtîkayê şerî û amancê turnuvayî de qisey kerd.

 

Di nasnameyî hemverê şerî de vindenê: Cinî û ciwanî

 

Seneme polîtîkayê şerê taybetî ke bi serran o dewam keno ard vîr û vat: "Komelê kurdî wayîrê adetê têkoşîn û xoverdayîşêk demdergî yo. Seba xoverdayîşî nasnameyî her tim hêrişan reyde ameyo rî bi rî. Dewlete hemverê nê de bi metodê cîya hêriş kerdê.   Kurdistan de şerê taybet û psîkolojîk yeno kerdiş. Di nasnameyê dînamîkî yê şarî yê cinî, yê bînî zî ciwan ê. Serê nê her di nasnameyan de polîtîka şerê taybetî est o. Hem cinîyan, hem ciwanan hedef gêno. Kurdistan de polîtîkaya fuhuş, tîryakî yena caardiş."

 

‘Hemverê hêrişan de xoverdayîşê ma est o'

 

Seneme vat hemverê hêrişê topyekun de xoverdayîşê topyekun est o û wina dewam kerd: "Ma hêrişê hemverê kurdan de vînenê. Şexsê cinîyan de wazenê komelê kurdî birijnê. Ma nameyê Gulîstan Doku da turnuvayê xo. Ma wazenê hemverê sporê serdest rewşa dînamîkî ya ciwanan sporî reyde bîyarê têhet. Dişmin metodê şerî vuryeno, ma zî têkoşînê xo aver benê û vurnenê."

 

‘Muracatî zaf zêde yê'

 

Seneme wina qedêna: "Stenbol, Edene, Mersîn, Amed, Qers, Riha, Dîlok,Wan, Êlih û xeylêk bajaranê bînan de ciwanan eleqeyêk pîl turnava rê mojnayî. Amancê muracatê  ciwanan tenê şahî nîya. Hîn cayan de maçî yenê kaykerdiş. Ciwanî yenê têhet. Ma ciwanan reyde şerê taybet munaqeşe kenê. Muracatî goreyê serra vîyarte zêdeyêr ê. Ma venga pêro ciwanan kenê ke hemverê polîtîkayê şerê taybetî de bêrê têhet, têkoşîn bikerê û polîtîkayan veng vejê."