Pelşîn Çetînkaya-Gulîstan Gulmuş

 

AMED - Cinîyan hêrişê hemverê kedkarê çapemenîye de ercnayîş kerd û dîyar kerdî ke operasyonê ke yenê kerdiş bi armancê vernîya rastî bêro girewtiş, yenê kerdiş û vatî: “Ma destbendkerdişan û tedayan qebûl nêkenê. Ma kîşte heqîqetî de yê."

 

Reaksîyonê hemverê tedayê serê çapemenîya azade de dewam kenê. Cinîyê Amedî derheqê hêrişê hemverê  Çapemenîya Azade de fikrê xo ardê ziwan.

 

Hasîbe Yazdik hêrişê serê çapemenîya azade de şermezar kerd û vat, nê tedayî bi amancê ke heqîqet nêvejîyo werte yenê kerdiş û wina vat: "No demêk derg o çapemenî binê tedaye de ya. Hemverê çapemenîya azade de hêrişî est ê. Wazenê çapemenîya kurde binê teda de verdê û bêveng bikerê. Wazenê vernîya rastî û heqîqetî padê û şar nêeşko xo biresno rastîyan. Ma nê destbendkerdişan qebûl nêkenê. Ma kîşte Çapemenîya Azade de yê. Ma nê hêrişan şermezar kenê. Amancê înan oyo ke şarî rê rastîyan nêmusnê."

 

‘Seba rastî bêrê zanayîş hewl danê'

 

Meryem Turan zî bale ant serê tedayan û wina vat: "Wazenê vernîya rastî padê. Embazê çapemenîye yenê destbendkerdiş. Embazê çapemenîye seba veng û ziwanê ma xebityenê. Ma bi ziwanê xo xêrê înan tay çîyan musenê. Ma destbendkerdişê înan şermezar kenê. Sûcê înan çin o. Seba her kes rastî bivîno têkoşîn kenê. Cinîyan rê cigêrayîşê zitî kenê. Ma înan  şermezar kenê."

 

‘Bi serran o tedayî est ê'

 

Sumeyye Kirici zî dîyar kerd ke tedayî ne tedayê newe yê û wina vat: "Nê tedayî neweyî nîyê. Bi serran o nê tedayî est ê. Hemverê çapemenîya kurde de tecrîd û destbendkerdişî dewam kenê. Ma nê tedayan qebûl nêkenê. Seba wazenê heqîqet vejê werte, na rewşe de yê. Ganî bêrê veradayîş."

 

‘Wazenê vengê zîndanan bidê eşnawitiş'

 

Necmîye Yaşar zî dîyar ke rojnamegerî goreyê meslegê xo têgêrenê û wina qedêna: “Rojnamegerê cinî yê ameyî tepiştiş, vengê zîndanan bi dinya danê eşnawitiş. Seba rastîyan neql kenê yenê tepiştiş. Ma na rewşe şermezar kenê. Rojnamegerî meslegê xo kenê. La bi karê xo yenê sûcdarkerdiş. Wa rojnamegerî bêrê veradayîş."