STENBOL - Îdianameyê 9 rojnamegerê ke Esra Solîn Dal, Mehmet Aslan û Erdogan Alayûmatî yê tepişte zî mîyan de pêşkeşê dadgehe ame kerdiş. 

 

Sereştişê keyeyan ê 23yê nîsane yê Stenbolî de mûxabîra Ajansê Mezopotamyaye (MA) Esra Solîn Dal, xebatkarê Rojnameyê Yenî Yaşamî Enes Sezgîn, kedkarê Çapemenîya Azade Saliha Aras, Yeşîm Alici, Beste Argat Balci, Şîrîn Ermîş û rojnameger Erdogan Alayûmat, Anqara de mûxabîrê MAyî Mehmet Aslan û Riha de zî mûxabîrê MAyî yê verê Dogan Kaynak amebî destbendkerdiş. Rojnamegerê ke 26ê nîsane de sewqê Edlîyeyê Çaglayanî ameyî kerdiş Mehmet Aslan, Esra Solîn Dal û Erdogan Alayûmat bi îdiayê “endamîya rêxistine” tepişyayî.

 

Serdozgerîya Komare ya Stenbolî cipersayîşê derheqê rojnamegeran de temam kerd. Îdianameyê rojnamegeran 25ine Dadgeha Cezaya Giran ya Stenbolî rê ame şirawitiş. 

 

Ganî dadgehe mîyanê 15 rojan de qerar bido ke do îdianame bêro qebûlkerdiş yan nê.