MERKEZÊ XEBERAN - Festîvala Cinîyan ê Zîlane ke  emser 18ine yeno organîzekerdiş, do 15ê Hezîrane de bajarê Dûîsbûrgî yê Elmanya de bêro organîzekerdiş.

 

Cinîyê kurdî yê Elmanya, Belçîka û Holanda emser 18ine Festîvala Cinîyan ê Zîlane bi serkêşîya Yewîya Cinîyanê Kurdan ê Elmanyayî (YJK-E) organîze kenê.

 

Festîvale emser bi sloganê "Bi Jin, Jiyan, Azadî ber bi Şoreşa Jinê ve" pê yeno û do 15ê Hezîrane de bajarê Dûîsbûrgî yê Elmanya de bêro organîzekerdiş.

 

Festîvala ke wayîrê bernameyêk dewlemend ê kultur û hunerî ya, hunermend Xecê, Sîmav Huseyîn, Suna Alan, Firmêsk, Koma Zarokan a MA, Koma Folklorî yê Efganistanî, Govend, Koma Zarokên Rojê, Cinîyê Dengbêjî do hunerê xo pêşkêş bikerê.

 

 

Sewbîna do festîvale kuçeyêk seba kulturê kurdî bêro  amadekerdiş û pêro motîfê kurdî bêrê mojnayîş. Resamê cinî zî do berardişê xo yê serê têkoşînê cinî bi pêşangehêk bimojnê.

 

Komîteya amadekar ê Festîvala 4ine kombîyayîşê xo viraşt. Komîteya Amadekarî ya festîvale verfeka TJK-Ewropayî Ayten Kaplan û verfeka YJK-Eyî Kezban Dogan qisey kerd. Verfeka TJK-Eyî Ayten Kaplane wina vat; "Sey her serre ma emser zî wazenê bi felsefeya jin, jiyan, azadî wareyê festîvale de hêzê xo yê rêxistinî û têkoşînê xo bikerê yew. Ma do emser festîvale de hin neweyîyayan viraznê. Hem hetê kulturî ra hem zî hetê komelî ra ma ca bidê ewnîyayîşê cîya ke pêro cinî bieşkê kede û hunerê xo pêşkêş bikerê û mesajê xo yê sîyasî bidê. Seba tutan zî do ware bêro amadekerdiş û tutî do kêliyê weş Koma Zarokên MA reyde derbaz bikerê."

 

Ayten Kaplane peynîya qiseykerdişê xo de venga pêro cinîyan kerd ke bi rengê xo başdarî 18ine Festîvala Cinîyan ê  Zîlane bibê.

 

Verfeka YJK-Eyî Kezban Dogan zî fikrê xo wina ard ziwan: "Amadekarîyê ma ver bi peynî de şinê. Festîvala şehîd Zîlane hem hetê nameyê xo, hem zî hetê sloganê xo ra xeylêk muhîm a. Ma bi na festîvale wazenê bibê cewabê demî. Senîn 10ê Teşrîna Verêne 2023ine hamleyê bi sloganê 'Azadî Abdullah Ocalanî rê, çareserî problemê kurdî rê' cinîyan rolê xo kay kerd. Prosesê na festîvale de zî ma bawer ê cinî do hemverê her tewirê hêrişan helwestê xo ramojnê."

 

Kezban Dogane venga pêro cinîyan kerd ke 15ê Hezîrane de wareyê festîvale de bi rengê xo bi xemilnê.