Rabîa Onver

 

COLEMÊRG - Çalakîya tepişteyan ê boykotkerdişî yê seba azadîya fîzîkî ya Rayberê PKKyî Abdullah Ocalanî dewam kena. Merdimê tepişteyan ê Şemzînan û Geverî derheqê babete de qisey kerdî û dîyar kerdî ke seba tecrîd peynî bibo, ganî game bêro eştiş.

 

 

Tepişteyê sîyasî çarçewaya kampanyaya mîyanneteweyî ya “Abdullah Ocalanî rê azadî, problemê kurdî rê çareserîya demokratîk” de, 27ê Teşrîna Peyêne 2023ine de dest bi grevê vêşanîya bêdem û dore kerdibî. Tepişteyê sîyasî çalakîya xo ya 4ê Nîsane ra bi nêvejîyayîşê pêvînayîşê rî bi rî, redkerdişê pêvînayîşê bi telefonî û bi çalakîya nêvejîyayîşê dadgehan dewam kenê. Merdimê tepişteyan zî 6ê Gulane ra dima bi sloganê ‘veng bidê vengê azadîye’ çalakîya xo dewam kenê.

 

Merdimê tepişteyan yê Gever û Şemzînanî veng dayî ke ganî lezkî tecrîd peynî bibo.

 

‘Lajê mi surgun kerdî hîrê rojan mi agahî ci ra nêgirewt’

 

Gulşen Geylanî dîyar kerd ke lajê aye Samî Geylanî 14 serrî yo bi hawayêk bêhuqûqî tepişte yo û vat: “Tecrîd Îmraliyî de dest pêkerd û ewro tesîr serê pêro zîndanan kerdo. Ma keyeyê tepişteyan wazenê tecrîd peynî bibo. Ma keyeyî endîşeyîn ê. Ma tecrîd qebûl nêkenê. Pêwa cezaya lajê mi aşma Hezîrane de qedîyaya zî hema nêameyo veradayîş. Nika hucreyê yew kesî de yeno tepiştiş. Ma zîndan ra vanê, çira nîno veradayîş? Vanê ke ‘sûc kerdo, nîno veradayîş’. Sebebê veşnayîşê înfazê lajê mi oyo ke wendişê sirûdê îstîklalî red kerdo, hûmartişê serê lingan red kerdo. Lajê mi surgun kerdî ma hîrê rojî ci ra agahî ci ra nêgirewt. No çîyo ke kerdî zulm o.”

 

‘Wa wezaret game bierzo’

 

Gulşene vat, cayê ke huqûq û edelet çin o bi serran o pey edeletî şinê û wina vat: “Ez venga wezaretê edaletî û partîyê sîyasî kena. Seba peynîbîyayîşê tecrîdî wa game bierzê. Tutê ma hucreyan de yenê tecrîdkerdiş. Zîndanan ra cenaze vejîyenê, ma do verê wezaretê edaletî de adir bifînê bedenê xo. Ma  agahî tutanê xo ra nêgînê. Ma bi endîşeyîn ê. Wa semedê wedaritişê tecrîdî game bêro eştiş.”

 

‘Wa tecrîd peynî bibo’

 

Emîne Atak zî dîyar kerd ke bi serran o seba wedaritişîê tecrîdî game nîna eştiş û wina vat: “Hemverê zîndanan de her kes kor û ker o. Serê serek û tepişteyan de tecrîdêk giran est o. Hîrê serrî yo serekî ra agahî nîna girewtiş. Ne avûkatî û ne zî keyeyî nêeşkenê pêvînayîş bikerê. Ma 4ê Nîsane ra agahî tepişteyan ra nêgînê. Wa no tecrîd wurzo. Ma tutanê xo mereq kenê. Waştişê ma wedaritişê tecrîdî yo. Ma wazenê tutanê xo ra û serekî ra agahîyêk bigîrê.”