Gulistan Gulmuş

 

AMED - Seba Şervan Gulel ke Hasret Tutal qetil kerdebî, ceza amebî fistiş û 15 serrî ceza ameye birnayîş. Avûkatan îtîrazê qerarî kerdî. Dayîka Hasrete, Hedîye Tutal seba dewaya ke do 17ê Gulane de bêro vînayîş veng da û vat: “Ma wazenê vernîya cînayetê cinîyan bigîrê. Wezaretê edaletî, komeleyê cinîyan wa kîşte ma de bibê.  Ez venga tewrbîyayîşê roniştişî kena.” 

 

Hasret Tutale 7ê teşrîna verêne 2021ine de hetê camêrdê bi nameyê Şervan Gulel ra amebî qetilkerdiş. Qerarê roniştişê dewaya 27ê êlule 2023ine de 3ine Dadgeha Cezaya Giran ya Rihayî de amebî vînayîş. Heyetê dadgehe sûcê ‘qestî kes kiştiş’ cezaya muebetî’ da şikdarî. Heyetê dadgehe ‘têgêrayîşê roniştişî yê şikdarî verê çiman de girewt’ û ceza ewil vurna 18 serrî û ‘texrîkê bêheq’ ‘rewşa baş’ verê çiman de girewt û ceza vurna 15 serran. Avûkatanê Hasrete îtîrazê qerarî kerdî û dosya berdî Dadgeha Edliye ya Herêmî ya Dîlokî. Netîceyê îtîrazî  de do dewa newe ra 17ê Gulane de bêro vînayîş. Dayîka Hasrete, Hediye Tutal derheqê babete de qisey kerd û venga paştdayîşî kerd.

 

‘Vanê ke aye întîxar kerda, tîryakî şuxilnaya’ 

 

Hedîye vat, dejê înan hema sey xo yo û wina vat “Prosesê dadgehe pozîtîf derbas nêbî. Ma pawitêne ke şikdar cezayêk giran bigîro. Cînayetê wina de cezayê winasî rast nîyê. Wexto ke cezayê bi tesîr nêrê dayîş kesê bînan rê zî benê nimûne. Bi no hawa do cînayetî zêde bibê. Şikdar ewilî înkar bikero zî ma fam kerd ke o kerdo. Ewilî vat întîxar o. Cayê cîya vat. Ewil çîyê cîya ame vatiş. Dimayê ke dîmenî vejîyayî werte ma fam kerd cînayet keyeyê xo de kerdo. Zaf bi nakokî qisey kenê. Vatêne, ‘aye xo întîxar kerda, tîryakî şuxilnaya’. Kênaya mi cixara antêne la eleqeyê aye bi tîryakî çinbî. Bibayîne mi do bizanayîne. Ma rêça derban bedenê aye de dî. Wexto ke ma dî înkar kerd. La ma dima ra musayî ke şîdet aye rê ameyo kerdiş.”

 

‘Çîyêk cîya estbî’

 

Hedîye qiseykerdişê xo wina dewam kerd: “Wa êdî cinî nêbê qurban. Ma nêwazenê cinî bibê qurban. Îdiayê ke Hasrete tîryakî şuxilnaya tu rastîyê ci çin ê. Hasrete têkilîyê xo yê Şervanî reyde problem ciwîyayîne. Seba tedayan nê problemî nêvatêne. Kênaya mi tîryakî bişuxilnayîne, mi do bizanayîne. Eke bişuxilnayîne di hewteyan ameye verê mi gelo do senî bivendirtêne. Cixara antêne. Sewbîna çîyêk nêşuxilnayîne. Seba xo xilas bikerê îftîra erzenê kênaya mi ser. Ameyîne tehdîdkerdiş. Tedayî ci rê ameyîne kerdiş.”

 

‘Ganî na dewa wina nêra padayîş’

 

Hedîye peynîya qiseykerdişê xo de dîyar kerd cezaya ke şikdarî girewta qîm nêkena û wina vat: “17ê Gulane de do dewa ra bêro vînayîş. Ceza nika bi tesîr nîya. Ma îtîraz kerd. Vera ke muebet bigîro 15 serrî dayê. 15 serran zî do nêmano. No edaletêk senîn o? No welatêk senîn o? Her roje cinî yenê qetilkerdiş. Do peynîya înan nêro. Ganî cezayê giranî bêrê dayîş. Ma wazenê vernîya cînayetê cinîyan padê. Wezaretê Edaletî, komeleyê cinîyan wa kîşta ma de bibê. Ez venga tewrbîyayîşê roniştişî kena.”

 

Se bîbî? 

 

Camêrdo bi nameyê Bekîr Şervan Gurel Karakopru yê Rihayî de taxa Akpiyarî de Hasret Tutal bi çeke bi giranî birîndar kerdebî. Dimayê hêrişî Hasrete wedarnabî Nêweşxaneyê Perwerde û Cigêrayîşî yê Mehmet Akîf Înan û uca de dinyaya xo bedelnabî. Dima ra şikdar amebî destbendkerdiş û tepiştiş.