MERKEZÊ XEBERAN - Netîceyê hêrişê bi SÎHAyî yê Tirkîya de 4 kesî dinyaya xo bedelnayî û 11 kesî zî birîndar bîyî. 

 

Teyareyê biçek û bêmerdim ê Tirkîya dewanê Henwa û Selmase yê girêdayeyê bajarê Til Hemîsî yê kantonê Cizîrî rê bombavaran kerdî. Wexto ke roniştoxî seba wedaritişê birîndaran verê xo dayî cayê hedîse, reyke bîn hêrişêk hewayî pê ame.

 

Hêriş de cinî û tutî zî mîyan de 11 welatîjî birîndar bîyî.

  

Merkezê Neqlkerdişî yê Hêzê Sûrîyeya Demokratîke (QSD) derheqê hêrişê Tirkîya yê serê kantonê Cizîrî de eşkerayîyêke weşêna. Eşkerayîye de wina ame vatiş: "Dewleta tirkan a îşxalkere, roja îne saetê dimayê nîmerojî û yê ver bi şanî de bi teyareyê bê merdimî yê bi çeke 8 rey hêrişê nuqteyê hêzê ma, keye û erebeyê sivîlan kerd. Netîceyê hêrişan de şehîd û birîndarî est ê.

 

Dewleta tirkan a îşxalkere bi teyareyê bê merdim ê bi çeke herêma Til Hemîsî de nuqteyêke hêzê ma û derûdorê bajarê Qamişloyî de nuqteya Hêzê Erka Xopawitişî bombavaran kerdî. Artêşa îşxalkere Qamişlo de di rey keyeyê sivîlan û 3 rey erebeyê sivîlan bombavaran kerd. Netîce de 11 sivîlî birîndar bîyî. Dewleta tirkan bi teyareyêk bê merdim ê bi çeke erebeyê ambulansa ke hewl da şehîd û birîndaran wedarno zî kerd hedef.

 

Netîceyê hêrişê dewleta tirkan ê îşxalkere de 4 şervanê ma şehîd bîyî û 11 sivîlî zî birîndar bîyî.”