Rojda Aydin

 

AGIRÎ - Vejîya werte ke mal û milkê Şaredarîya Gîyadînî ya ke qeyûm ci rê 116 milyon deyn verdayo, teslîmê sazgehê bînan ameyo kerdiş. Hemşaredara Giyadînî Hayat Zorbaye, bale ant serê sazgehê ke ameyê teslîmkerdiş û vat ke ê seba nê sazgehan peyser bigîrê do bikewê mîyanê hewldayîşî.

 

Şaredarîya Giyadînî ya Agirî yew şaredarîyê ke qeyûm tayînê ci amebî kerdiş a. Weçînayîşê herêmî yê 31ê Adara 2019ine de Partîya Demokratîke ya Şaran (HDP) se ra 56,82 rayî şaredarî bi dest kerd. La 13ê Temmuza 2020ine de qeyûm tayînê şaredarî amebî kerdiş. Seke zerarê qeyûmî yê qeza qîm nêkerdibî, qeyûmî nêrotişî yê şaredarî zî teslîmê sazgehê cîya kerd. Qezaya Giyadînî ke reyke bîn destê qeyûmî ra ameye girewtiş, wesayîtê ke rayîrê bi çale yê xira ra derbaz benê, açaryenê xûrdeyan. Çalê ke rayîr de yenê vînayîş zî mojnenê ke qeza de tu xebate nêameya kerdiş. Weçînayîşê herêmî yê 31ê Adara 2024ine de şarî ancî îradeyê xo mojna û bi dayeyêk berz rayê xo dayî Partîya Têduştî û Demokrasîyî yê Şaran (DEM Partî).

 

Hayat Zorbaya ke netîceya îradeyê şarê Giyadînî de bî hemşaredar, derheqê zerarê ke qeyûmî dayê qeza û şaredarî de ajansê ma rê qisey kerd.

 

‘Qeza ameya wêrankerdiş’

 

Hayate, ard ziwan ke şar dimayê weçînayîşî bi coşêk mezin wan pêşwazî kiriye û got ku hesasiyeta gel a li pîl înan pêşwazî kerdo. Hayate wina vat: “Semedo ke di serdemê qeyûmî ameyî tayînkerdiş, rayîrê qeza rewşêke zaf xirab de yê. Her ca rijyayî yo. Qeza ameya wêrankerdiş. Seba şarî çîyêk nêameyo kerdiş. Serdemêk talankerde ameyo ciwîyayîş. Her çend hîn wesayîtî ma rê bimanê zî pêro hacetê ma rewşêke xirab de yê. Sere de ma wazenê wesayîtê şaredarîye tamîr bikerê û dima ra xizmetê şarê xo bikerê.”

 

Mal û milkê şaredarî ameyê teslîmkerdiş!

 

Hayate, bale ant ke qeyûm şaredarîya Giyadînî rê 116 trîlyon deyn verdaya û wina vat: “Pêwa nê deynî mal û milkê ma yê ke teslîmê sazgehê bînî ameyê kerdiş zî est ê. Nimûne 57 donim wareyê kaplicayî, Merkezê Rehabîlîtasyonî, hezar û 500 metrekare erd teslîmê qeymeqamtîyê qeza ameyo kerdiş. Kafeteryaya ke derûdorê Merkezê Kaşî yê, teslîmê Midûrîyê Perwerdeyîyê Millî yê Qeza ame kerdiş. Şaredarî de kerrayê parqeyan estbî, la ma şan de şaredarî bi dest kerd, ê kerrayî pêro wedarnayî û berdî cayêk bîn.”

 

'Seba cinî û tutan perwerdeyê ziwanê zikmakî do bidê'

 

Hayate, bale ant serê ziwanê dayîke û wina vat: “Ma wazenê ke nê sazgehan peyser bigîrê û seba ciwan û cinîyê ke wareyê perwerdeyî awan bikerê. Ma wazenê bi dayîşê perwerde û kursan ciwanê ke seba  unîversîte amadekarî kenê tewrê perwerde û nê kursan bikerê. Seba cinîyan projeyê ma yê Merkezê Paştdayîşê cinîyan est ê, ma plan kenê ke nê abikerê. Ma wazenê wareyêk îstîhdamî awan bikerê  ke cinî bêrê û karê xo yê destan bikerê û berardişê ke bi xo virazenê biroşê. Xêrcê wareyê îstîhdamî, ma amanc kenê ke wareyêk ke cinî û tutî ci de perwerdeyê ziwanê kurdkî bivînê abikerê. Bi xêrê nê perwerdeyî ê do bieşkê bi ziwanê xo yê dayîke qisey bikerê û binusê. Binê banê şaredarî de keyeyê kayî yê tutan zî est o, la nika no ware destê ma de nîyo. La demo ke ma girewt ma do perwerdeyê bi kurdkî bidê tutanê uca ke ziwanê xo yê dayîke bimusê.”