Rabîa Onver

 

COLEMÊRG - Cinîyê Colemêrgî hemverê tayînkerdişê qeyûman ê seba şaredarîya Colemêrgî dest bi nobete kerdî û wina vatî: “Ganî lezkî na şaşîye ra agêrê. Ma do wayîrê îradeyê şarî vejîyê û ma do dorê hemşaredaranê xo bibê xelek.”

 

Hemşaredarê Partîya Têduştîye û Demokrasî (DEM Partî) yê Colemêrgî Mehmet Siddik Akiş hetê wezaretê karê zerreyî ra wezîfe ra ame girewtiş û walîyê bajarî Alî Çîçek sey qeyûm tayînê şaredarî kerdî. Dimayê nê xeylêk bajaran de çalakî dest pêkerdî. Colemêrg de bi tewrbîyayîşê hemserekê rêxistinê DBPyî, parlamenterê DEM partî û 3 hemşaradarê bajarê pîlî yê merkezê Colemêrgî de rayîrşîyayîş ame kerdiş. Di kuçeyê bajarî de seranser rayîrşîyayîş pê ame û girse kuçeyê Bulvanî de dest bi çalakîya roniştişî kerdî. Qedexeyê bernameyan yê 10 rojan sebeb mojnayî û xêrcê parlamenteran nêverdayî kes tewrê çalakîye bibê.

 

Hemşaredara Bajarê pîlî ya Wanî Neslîhan Şedal û parlamentera DEM Partîye Şirnexî Newroz Uysal nobete de ca girewtî û heta siba nobete dewam kerdî, ercnayîş kerdî.

 

‘No hîrê demî yo îradeyê şarî yeno xespkerdiş’

 

Hemşaredara bajarê pîlî ya Wanî Neslîhan Şendal da zanayîş ke no hîrê demî yo îradeyê şarê kurdî yeno xespkerdiş û wina vat: “Hemverê nê xespkerdişê îradeyî de ma bi tu hawayî nê sey prosesê normalkerde nêvînenê. Hemverê çinkerdişê îradeyê şarê kurdî xespkerdişê heqê kurdan ma heqê xo yê demokratîk ca anê û ewro no semed ra ma tîya yê. Bi hîrê demî yo ma nê bêhuqûqî reyde rî bi rî yê. No zîhnîyeyêk hîrê demî nîyo, no seserran o dewam keno. Hemverê kurdan de seserre yo polîtîkaya înkar û îmha est a. No zî dewamê na polîtîkaya çinkerdişî ya.”

 

 

‘Wa şar hemverê xespkerdişê îradeyî bêveng nêmano’

 

Parlamentera DEM Partî Newroz Uysal zî derheqê babete de fikrê xo ard ziwan û vat: “Xeylêk bajaranê Kurdistanî de çalakî û reaksîyonî yenê mojnayîş. Ma tîya yê. Ma nobete de yê û ma do nobete dewam bikerê. Pêwa îradeyê Colemêrgî nika dorê ma ameyo girewtiş û hewl danê ke ma asteng bikerê. la pêwa pêro astengîyan ma tîya yê. Bi tewrbîyayîşê hemserekê pêroyî yê DEM partîye, ma do eşkerayîyêke bidê. Ma venga pêro kesan kenê ke hemverê xepskerdişê îradeyî vengê xo berz bikerê.”