WAN- Gulcan Kaçmaz Sayyigit wendişê cinîyan ê  derheqê tecrîdî ke Wan de ameyo kerdiş, qisey kerd û da zanayîş ke polîtîkayê tecrîdî tesîr pêro şarê Tirkîya sero keno.

 

Tecrîdê giran ê serê Rayberê PKKyî ke 39 aşmî yo tu xebere nîna girewtiş, her ke şino giran beno. Zîndanan de çalakîyê bi boykotan dewam kenê. Çarçewaya kampanyaya ‘Abdullah Ocalanî rê azadî problemê kurdî rê çareserîya sîyasî’ çalakîyê wendişê nuştişê Abdullah Ocalanî pê yenê û tewrbîyayîşê seba wendişî xeylêk zêde yo. Xeylêk bajaran de wendişî dewam kenê û Wan de zî ame kerdiş. Parlamentera Partîya Têduştîye û Demokrasîyî yê Şaran (DEM Partî) ya Wanî Gulcan Kaçmaz Sayyîgît derheqê tecrîdî û bernameyê wendişî de ajansê ma rê qisey kerd.

 

‘Cezayê dîsîplînî huqûqî nîyê’

 

Gulcane da zanayîş ke 25 serrî yo serê Rayberê PKKyî Abdullah Ocalanî de polîtîkaya tecrîdî yena kerdiş û 39 aşmî yo zî tu xebere ci ra nîna girewtiş. Gulcane wina vat: “No tecrîdo giran, nêverdenê keye û avûkatî pêvînayîş Birêz Ocalanî reyde bikerê. 3 yan zî 6 aşmî ra reyke cezaya dîsîplînî danê. Na ceza tu hetê ci yê huqûqî çin a. Seba şiknayîşê tecrîdê giran ê serê Birêz Ocalanî û tecrîdê zîndanan bêro şiknayîş, ma xebatan kenê. Zîndanan de grevê vêşanîye ame destpêkerdiş. Seke yeno zanayîş grev 4ê Nîsane de vuryayî boykot. Dayikî zî teber de çalakîyan dewam kenê. Amancê nê çalakîyan çareserîyêk mende yo û aştîyane yo. Ganî seba çareserîye vernîya her çî tecrîdê serê Birêz Ocalanî bêro şiknayîş.”

 

 

‘Ganî wareyê tesîrî hîra bibo’

 

Gulcane bale ant serê bernameyê wendişî û wina vat: “Şikinayîşê tecrîdî û bi metodê aştîyane çareserkerdişê problemê kurdî seba ma muhîm o. Şar çi fikrîyeno, şar na noqta de çi wazeno. Ganî wareyê tesîrî bêro hîrakerdiş. Ganî ma xo biresnê girseyê hîna hîra.”

 

‘Ganî CPT wezîfeyê xo bîyaro ca’

 

Gulcane wina peynî kerd: “No hiqûq goreyê destûra bingehîn nîyo û peymanê mîyanneteweyî nîyo. Ganî no bêro teşhîrkerdiş. Ganî pêro rêxistinê wareyê mîyanneteweyî îtîraz bikerê, reaksîyon bimojnê.  Belê, reyan reaksîyonê qelsî vejîyenê werte la çi heyf netîce nêdanê. Ganî bi taybetî CPT wezîfeyê xo bîyaro ca. Şerê ke yeno ciwîyayîş tenê zirar nêdano şarê kurdî, tesîr pêro Rojhelatê Mîyanên keno. Ma veng danê ke no şer bi lezkî peynî bibo, no tecrîd bêro wedaritiş. Amancê ma oyo ke heqê m bêro dayîş. Goreyê ma cuyêka têduşte pîya mumkin a.”