Pelşîn Çetînkaya-Gulistan Gulmuş

 

AMED - Dimayê ke qeyûm tayînê şaredarîya Colemêrgî bî verê şaredarîyê DEM Partîye çalakîya roniştişî ameye destpêkerdiş. Cinîyê ke çalakî de ca girewtî dîyar kerdî ke qeyûm caardişêk taybet ê serê îradeyê kurdan o û nê mesajî dayî: “Do kayê xo yê lêşin de bifetisîyê.”

 

Bi destê wezaretê karê zerreyî ê AKPyî 3yê hezîrane de hemşaredarê Colemêrgî Mehmet Siddik Akiş ame destbendkerdiş û dima ra zî qeyûm vera ci tayîn kerdî. Hemverê nê de protestoyî dewam kenê û vizêr zî 19 serrî û 6 aşmî ceza Siddik Akişî rê ameye birnayîş. Kurdistan û Tirkîya de hemverê qerarî de her ke şino reaksîyonî zêde benê, xoverdayîşî dewam kenê. Amed de verê şaredarîya Peyasî de xoverdayîş dewam keno. Endamê meclîsê şaredarî ke beşdarê çalakîye bîyî, venga wayîrvejîyayîşê îradeyê şarî kerd.

 

‘Şarê Fîlîstînî paweno la welatê xo wêran keno’

 

Cinîya bi nameyê Hatîce Guneş da zanayîş ke dewlete 3 rey qeyûm tayînê serê kesê ke înan weçînayê kerda û wina vat: “Reyke bîn dest dayî serê şaredarî. Weçînayîşî benê, şar vano ma nê nêwazenê. Şar vano, ‘ez îradeyê xo wazena.’ La ancî zî şerm nêkenê û qeyûm tayîn kenê. O wext çira weçînayîş yeno kerdiş. Dinya ra vanê ma demokrat ê û weçînayîş kenê. La îradeyê şarî verê çiman de nêgînê. Eke tay şermê înan bibo do îradeyê şarî peyser bidê. Wa embazanê ma vera bidê û wa embazê ma bêrê serê wezîfeyê xo. Ganî şarê tirkî zî nê qebûl nêkero. No zulm o. Şarê Fîlîstanî pawenê la welatê xo wêran kenê.”

 

‘Qanûn, huqûq û edalet çin o’

 

Zahîde Kutlu zî dîyar kerd ke ancax îqtidar bi xesp û bêusulî yenê îdarekarî û wina vat: “Şar aya bîyo. Şima nas keno. AKP şaredarîyê ke bi dest nêkerdê, wazeno wina bidest bikero. La se kenê wa bikerê do şar tercîhê xo bikero. Tirkîya de qanûn, huqûq û edalet çin o.”

 

‘Nê kayê lêşîn yê AKP û MHPyî yê’

 

Fatma Azak zî wina reaksîyon mojna: “Qeyûm ne tenê seba şaredarî, hemverê şarê kurdî de ameyo tayînkerdiş. Ma nê zulmî qebûl nêkenê. Nê kayê lêşîm yê AKP-MHPyî yê. Do rojêke nê kayan de bifetisîyê. Ma do zî nêrê kayanê lêşinan. Ma do têkoşînê xo dewam bikerê. Ma do xo ver bidê, serkewtiş ê ma yo.”

 

‘Kayê înan veng vejîyayî’

 

Melîha Gurluk zî wina vat: “Kurdan sero heta ewro xeylêk kayî ameyî kaykerdiş. La pêro zî veng vejîyayî. Colemêrg de şaredarîya ma ameye desteserkerdiş. Nê xespî hemverê kurdan de ameyê kerdiş. Heta nika xeylêk kayî û plan kerdê la veng vejîyayî. Ewil Wan ra dest pêkerdî. La ser nêkewtî. Ma do Colemêrg zî peyser bigîrê. Ma dest bi nobete kerda. Ma fek têkoşînî ra vera nêdanê.”