STENBOL - Dayîkê/Merdimê Şemeyî hewteyê 1002ine de çalakîya "Wa vînîbîyayeyî bêrê vînayîş û kiştoxê bêrê muhakemekerdiş" Meydanê Galatasarayî de kom bîyî û aqûbetê Veysel Guney persayî. 

 

Dayîkê/Merdimê Şemeyî hewteyê 1002ine de çalakîya "wa vînîbîyayeyî bêrê vînayîş û kiştoxî bêrê muhakemekerdiş" Meydanê Galatasarayî de dewam kerd. Dayîkê/Merdimê şemeyî bi qurnefil û fotografê vînîbîyayeyan ameyî Meydanê Galatasarayî û dest bi çalakî kerdî. Pawitoxê heqê merdiman zî tewrê çalakîye bîyî. Dayîkê Şemeyî no hewte aqûbetê Veysel Guneyî yê 24 serrî yo ke dimayê darbeyê 12ê êlule 28ê Kanûna 1980ine de Dîlok de bi birîndarî destbend kerdî û vînî kerdî, persayî. Kênaya Fehmî Tosun ke destbendkerdiş de amebi vînîkerdiş, Besna Tosune malumat da çapemenîye. 

 

Besna Tosûn, vat ke dimayê hewteyê 1000ine ancî Meydanê Galatasarayî bi bendan ameyo padayîş û wina vat: “Ma tîya ra persenê, Dadgeha Destûrê Bingehîn destûr da ke ma seba heqê xo Meydanê Galatasarayî de waştişê xo bîyarê ziwan. Şima çira  asteng kenê? Meydano ke hewteyê 1000ine de çalakîyan rê abî, çira 1001ine de ancî padayî? Ma wazenê derheqê nê de malumat bidê.”

 

Besna persê “Veysel Guney ça de yo?" persa û vat: "Veyselî bi birîndarî destbend kerdî. Dadgeha Leşkerî ya Hûmara 2yîn ê Herêma Asayîşê yê Edeneyî de ame muhakemekerdiş. Waştişê Veysel Guneyî yê pawitişî red kerdî. Heqê ci yê pawitişî destê ey ra girewtî. Roniştişê yewin 6ê Sibata 1981ine de pê ame. 17ê Sibata 1981ine de roniştişê diyîn pê ame. Vera ke sûc tespît bikerê, mehkûmê îdamê kerdî. Qerarê Meclisî bi qanûnê taybetî 10ê Hezîrana 1981ine de Zîndanê Tîpê Eyê Dîlokî de darde kerdî." 

 

Dima ra mektubê ke Dogan Guney seba mamê xo Veysel Guney şirawitibi, hetê Serekê Şubeyê ÎHDyê Wanî ra ame wendiş. Veysel Guney dîyar kerd hemverê huqûqî de mamê ey dardekerdî.