Nazlican Nûjîn Yildiz

 

ÎZMÎR - Serê qetilkerdişê Denîz Poyraze ra hîrê serrî derbaz bî. Fehîme Poyraz da zanayîş ke her roje seba aye sey roja ke Denîze ameya qetilkerdişî ya û pêwa her çî aye vana, aştî û do fek têkoşînê xo ra vera nêdo.

 

17ê Hezîrana 2021ine de şikdar Onur Gencer hemverê awanîya rêxistina Partîya Demokratîke ya Şaran (HDP) ya Îzmîrî de hêriş kerd û Denîz Poyraz qetil kerd. Pêwa hîrê serrî serê hedîse ra derbaz bî,  hêzê pey hêrişî nêvetî werte. Dadgeha ke şikdar Onur Gencer muhakeme kerd, roniştişê 6ine de qerar da. Heyetê dadgehe derheqê şikdarî de sûcê ‘plankerde û qestî kes kiştişî’ cezaya mubetî, sûcê ‘zirar dayo mal’ 4 serrî, sûcê ‘binpaykerdişê destnêdayîşî malî’ di serrî û sûcê ‘muxalefetê qanûnê çekan’ di serrî ceza birna bî.

 

Hîrêne serrgêra qetilkerdişê Denîze de, Fehîme Poyraz qisey kerd û vat ke şikdar Onur Gencer qirkerdiş de tenê nêbîyo û da zanayîş ke pêwa pêro tedayan şarê kurdî aştî waşto û wina vat: “Ma do her tim vajê aştî. Ma hetê aştîye de yê, hetê şerî de nîyê.”

‘Kiştox poşman nêbî’

 

Fehîme wina dewam kerd: “Ez tu wext na roje xo vîr ra nêkena. Seba mi zaf zehmet o. Canê mi veşa. Wa canê dayîkanê bînan nêveşo. Wa aştî bêro. Kiştoxî baş nêameyî muhakemekerdiş. Dadgehe çinî bî, çîyêk çinî bî. Şikdar dadgehe de sey çîyêk nêbîyo têgêra. No zî qîm nêkerd, huya û qeşmerîyê xo kerd. Vat, xemê mi nîyo. Canê ma zaf dej a. Dadgerî ci ra vat ti poşman ê? La ey vat, ez poşman nîya.”

 

‘Denîze, Denîza şarê kurdî bî’

 

Femîhe dîyar kerd şikdar vernîya ke Denîze qetil bikero, seba nêremo birîndar kerda û wina vat: “Kiştoxî bi xo vat, ‘Denîze xo ver da. Mi îşkence pê kerd, bi saetan ser de vinderta.’ No tu wext nîno xovîrrakerdiş. Bê pawitiş mendiş zaf zehmet o. Her kes wayîrê Denîze vejîya. Denîze tenê nîya, Denîza min ê şarê kurdî bî. Şarê kurdî wayîr vejîya. Zerrîya mi tay bo zî rehet bî. Dayîkê Aştîye, her tim aştîye wazenê. La ê se kenê? Qetil kenê, erzenê zîndanan. Ma vanê aştî la aştî çin a. Ne edelet, ne zî merdimayî est a.”

 

Têkoşîn de israr

 

Fehîme tewr peyîn wina vat: “Dimayê Denîze mi tewr zêde ca girewt. Hîn kesan vatêne, ‘kênaya to ameya qetilkerdiş ti hema zî xebatan de ya’. Mi zî vatêne ‘şima şaş fikrîyenê. Kênaya mi şehîd kewt.’ Ez o têkoşînê aye her tim dewam bikerê. Ma do hemverê nînan de sereyê xo nêtewênê. Ma hetê aştîye yê, hetê şerî de nîyê. Şarê kurdî her tim têkoşîn kerd. Ma do serbikewê. Ma azadîye wazenê.”