Gulîstan Gulmuş

 

AMED - Avûkate Gulşen Demîr, da zanayîş ke tecrîdo mutleq ê serê Rayberê PKKyî Abdullah Ocalanî rasterast tesîr serê tepişteyê sîyasî yê zîndanan keno. Gulşene bale ant serê muhîmîyê çalakîyê semedê tepişteyan û vat, "Ma her yew tepişteyê potansîyel ê."

 

Rayberê PKKyî Abdullah Ocalan ke Îmrali de yeno tepiştiş û pêro rayîrê neqlkerdişî ci rê padeye yê, bi  40 aşmî yo tu agahî ci ra nîna girewtiş. Eynî wextî de tepişteyê sîyasî yê ke zîndanê Kurdistanî û Tirkîya de 27ê Teşrîna Peyêne 2023ine û nata bi waştişê “Abdullah Ocalanî rê azadî û semedê meselaya kurdî çareserîya sîyasî” çalakîyan organîze kenê. Çalakîyê ke bi grevê vêşanîye dest pêkerdî, 4ê Nîsane û nata bi boykotkerdişê dadgehan û nêverdayîşê pêvînayîşê keyeyan reyde dewam kenê, tecrîdê zîndanan bi rengê binpaykerdişê heqan kûrêr beno. Na çarçewa de tepişteyî semedo ke xeylêk lazimîyê înan ca nînê, problemî tewir bi tewir reyde rî bi rî manenê. Yew nê problemî 25ê Hezîrane de Zîndanê Kampusê Amedî de rî da. 32 tepişteyî bi jehrî bî û wedarnayî nêweşxane. Raybera Merkezê Pêroyî yê Avûkatê Komeleya Azadîye Avûkate Gulşen Demîr, dîyar kerd ke jehrîkerdiş û xeylêk binpaykerdişê heqan tecrîdê mutleqî yê Rayberê PKKyî Abdullah Ocalanî ser xoser nîyo.

 

Ma avûkate Gulşen reyde serê jehrîbîyayîşê tepiştyan ê 25ê Hezîrane de Zîndanê Kampusî yê Amedî de qewimya, serê binpaykerdişê heqê tepişteyan û tecrîdî ser o qisey kerd.

 

'Tecrîd tesîr her ferdê komelî ser o keno'

 

Gulşene dîyar kerd ke 40 aşmî yo tecrîdo girankerde Abdullah Ocalanî ser yeno kerdiş û vat: “Telefono peyîn yê birayê Abdullah Ocalanî reyde 25ê Adara 2021ine de amekerdiş û no telefon zî ame birnayîş. A roje ra tepîya tu pêvînayîş keye û  avûkatanê ey reyde nêame kerdiş. Ma a bawerî de yê ke tenê bi tecrîdê serê Birêz Abdullah Ocalanî qalkerdişê tecrîdî rast nîyo. No tecrîdê Birêz Abdullah Ocalanî ser, metodêk îqtîdarî yo, polîtîkaya şerê taybetî yo. No zî beno seben ke her endamê komelî, bi taybetî cinî û tepişteyê bînî yê zîndan de  bikewê binê tesîrê tecrîdî."

 

'Wareyê weşîye de problemê cidî vînenê'

 

Gulşenê, wina qal kerd: "Komara Tirkîya ke terefgirê nê peymanan a, wexto ke zîndan awan kerd, vernîya heqê pawitişê merdiman girewt. Xeylêk binpaykerdişê heqan nê zîndanan de qewimyenê. Nê sebebî ra kesê ke zerre de yê, nêweş kewenê.  Qonaxê diyîn zî tepişteyî problemê weşîye ciwîyenê û bi problemê hewa, werd û awe û tecrîdî reyde rî bi rî mendê. Wexto ke ma tepişteyê nêweşan bîyarê rojeve, resayîşê weşîye de astengîyê cidî vînenê. No semedê tepişteyan zaf tengasî virazneno. Nê demî de, nê şert û mercê ke do bibê sebebê nêweşî awan kenê. Wexto ke tepişteyî nêweş kewenê, nînê tedawîkerdiş û bi tu hawayî îdarekarê zîndanî wezîfeyê xo ca nêano.”

 

Ame vatiş ke ‘tepişteyî hîn çîyan pîl kenê’

 

Gulşene ard vîr ke 23yê Hezîrana 2024ine de Zîndanê Kampusî yê Amedî de xeylêk hedîseyê jehrîkerdişî pê ameyê û vat, îdarekarê zîndanî vatî ke "Tepişteyê hîn çîyan pîl kenê.” Gulşene wina vat: “Wexto ke ma hewl dayîne cayê pêvînayîşî muwekîlê xo reyde pêvînayîş biqedînê, ma dî ke nêzdîyê 5 ambûlansî kewtî û vejîyayî. Pêvînayîşê ma yê muwekîlê xo reyde agahî ameye dayîş ke semedê roşanî nêzdîyê 10 rojî yo amadekerdişê werdî de problemê cidî est ê. Ma eşnawit ke xeylêk kesan nê prosesî de nêrehetîyêk dîyî. Peyîn de, a şewe, ê bi nêweşîyê giranî, sey virtiş, gêjbîyayîş û dejî mecbûrê nêweşxaneyî bîbî. Nêzdîyê 36 tepişteyî û mehkûmî wedarnayî nêweşxane. Ma zî bi rayîrê muwekîlanê xo bi şahidê hîn çîyan."

 

'Ganî ma bibê vengê tepişteyan'

 

Gulşene tewr peyîn wina vat: "Çîyo ke dewlete wazena awan bikero, sey ‘Maro ke dest nêdo mi hezar serre wa sax biciwîyo’. Tepişteyê sîyasî semedê tecrîdê Îmraliyî aşma Nîsane û nata keyeyê xo reyde ne têkiliyê fîzîkî, ne zî bi telefonî û ne zî beşdarê roniştişî nêbî. No het ra wezîfeyê ma oyp ke ma hewl bidê bibê vengî înan. Zaf lazim o ke şar vengê xo ser çîyê ke qewimyenê berz bikero. Ganî ma têkoşînê hempar dewam bikerê.”