Rozerîn Gultekîn

 

STENBOL - Avûkata Buroyê Huqûqî yê Asrînî Razîye Ozturk, derheqê tecrîdê girankerde yê ke 40 aşmî yo xebere Îmraliyî ra nîna girewtiş de qisey kerd û vat:  "Xebera nêgirewtişî yena manaya israrkerdişê çaresernêkerdişê meseleya kurdî."

 

Tecrîdê hemverê Rayberê PKKyî Abdullah Ocalanî dewam keno û 40 aşmî yo zî xebere nîna girewtiş. Muracatê avûkat û keyeyan zî 8 serrî yo pê nîno. Caardişê keyfî dewam kenê. Sewbîna Veysî Aktaşo ke 30 serrî yo tepişte yo, ganî bêro veradayîş serrêke  bîn ceza ci rê birnayî.

 

Buroyê Huqûqî yê Asrinî ra avûkate Raziye Ozturk, derheqê tecrîdî de ajansê ma JINNEWSî rê qisey kerd. 

 

'40 aşmî yo xebere nîna girewtiş’

 

Razîye, dîyar kerd ke Îmraliyî de her tim tecrîdêk est bî û wina vat: "40 aşmî yo xebere nîna girewtiş. Na rewşe yena manaya îşkenceyî. No îşkence hetê Dadgeha Heqê Merdiman ê Ewropayî (DMME) ra ameyo qebûlkerdiş û bi raporê CPTyî werte de yo. 40 aşmî yo îşkence, bêhuqûqî û hewldayîşê keyfî dewam kenê. 40 aşmî yo xebere nîna girewtiş û yeno manaya israrê nêçareserîyê meseleya kurdî. Werte ra nêwedaritişê tecrîdî yeno manaya israrê kurbîyayîşê krîzê ekonomî, sîyasî û komelî. Îmraliyî de huqûq çin o, pêro caardişî hemverê huqûqî yê labelê caardişê ke yenê kerdiş, bi qerarê dadgehe rê girê danê. Bîyayîşê qerarê dadgehe nînê manaya meşrûkerdişî." 

 

Hemverê tecrîdî xoverdayîş

 

Avûkate Razîye wina dewam kerd: "Hemverê tecrîdî de xoverdayîşêk pîl est o. Hemverê tecrîdî yê Birêz Ocalanî de vengêk yeno vetiş. Tepişteyî dest bi  çalakîya grevê vêşanîye kerdî û nika bi metodêk bîn xoverdayîşê xo dewam kenê. Aşma nîsane ra heta nika, keyeyê xo reyde pêvînayîş nêkenê û nêkewenê dadgehan. Bi çalakîyanê xo hewl danê ke rewşa îşkenceyî yê Îmraliyî teşhîr bikerê û rewşa Îmraliyî bi rayîrê keyeyê xo, rayaumûmî rê neql bikerê. Hetê şarî ra rayîrşîyayîş yeno kerdiş, tenê Tirkîya de nê her çar parçeyê Kurdistanî de çalakî yenê kerdiş." 

 

Konseya Ewropayî bêveng a

 

Razîye da zanayîş ke tecrîd dewamkerdişê komployê mîyanneteweyî yo û vat: "Ardişê Birêz Ocalanî yê Tirkîya, bi paştdayîşê dewletê bînî pê ame. Dewamkerdişê tecrîdî zî bi paştdayîşê dewletanê Ewropa ra pê yeno. Ma helwestê DMME, CPT û Konseyê Ewropa vînenê. Nê sebebî ra zî ganî têkoşîn bi rêxistinkerde dewam bikero. Nika pêro mekanîzmayê Konseya Ewropa bêveng a. Dosyayê ma yê DMMEyî paweyê qerarî rê yê, no pawemendiş yeno manaya dewamkerdişê tecrîdî. Semedo ke qerarêk îhlalî bêro dayîş do hetê qanûnî de bikewê  mîyanê tengîyê pîlî. Wexto ke ma qalê Birêz Ocalanî kenê, ma tenê qalê kesêk nêkenê û nê çî dewletê Ewropa baş zanê. Birêz Ocalan temsîliyetê bi milyonan kurdan o. Paradîgmaya Birêz Ocalanî tenê semedê şarê kurdî nê, eynî wextî de sîstemê bîyaye zî binîme lerznena. Awankerdişê modernîteyê demokratîkî do nê sîstemî biirjno. Nê semedî ra nê sîstemî nêwazenê, nêwazenê şar îdarekarîyê xo bikero, aştî pê bêro û modelê merdimê azad aver şino. Semedê sîstemê nika merdimê ke bieşkê tehekûm înan rê bikerê wazenê." 

 

Muracatî do dewam bikerê

 

Avûkate Razîye wina qiseykerdişê xo qedêna: "Muracatê ma yê mekanîzmayê Konseya Ewropaye dewam keno. Ma do muracatê xo yê NYyî zî dewam bikerê û mekanîzamayê herêmî de zî do muracatê ma pê bêrê."