WAN - ‘Turnuvaya futbolî ya Gulistan Doku’ ke meclîsê Ciwanan ê DEM Partî organîze kerd, derheqê qetilkerdişê cinîyan ke her roje zêde benê de mîkrofonê ma rê qisey kerdî. Endama meclîsê şaredarîya Tuşbayî Mulkes Avras derheqê qetilkerdişê cinîyan ê her ke şinê zêde benê de qisey kerd û vat: “Qetilkerdişê cinîyan binê nameyê ‘namûsî’ de yeno meşrûkerdiş. Goreyê ma tenê cinî nê merdişê tu ganeyî nêeşkeno bêro meşrûkerdiş.”

 

Tirkiye û Kurdistanî de qetilkerdişê cinîyan her ke şino zêde beno, pêwa nê merdişê biguman zî roj bi roje zêde benê. Goreyê çeteleyê ajansê ma yê aşma hezîrane tewr tay 34 cinî ameyî qetilkerdiş û 20 zî biguman dinyaya xo bedelnayî. Polîtîkaya bêcezaverdayîşî bena sebebê zêdebîyayîşê qetilkerdişê cinîyan. Xeylê qetilkerdiş hetê camêrdan ke ci reyde sewîyeya destveradayîşî de yê yan zî dest ci ra vera dayê pê yeno. Pêwa nê şîdetê leşker û polisan zî est o. Yew zî Gulistan Doku ya. Gulistane 5ê Çeleyî 2020î de vînî bî û reyke bîn xebere ci ra nêameye girewtiş. Bi 4 serrî yo persê ‘Gulistan Doku ça de ya?’ yeno perskerdiş.

 

Meclîsê Ciwanan ê DEM Partî turnuvayê Futbolî da destpêkerdiş û nameyê Gulistan Doku da ci. Cinîyê ke tewrê turnuvayî bîyî derheqê zêdebîyayîşê qetilkerdişê cinîyan de qisey kerdî.

 

‘Merdişê tu ganeyî meşrû nîyo’

 

Endama Meclîsê Şaredarîya Tuşbayî Mulkes Avrase vat pêwa 4 serrî yo Gulistan Doku vînî ya, aqûbetê aye nîno zanayîş û dewlete semedê nê tu game nêerzena. Mulkese wina vat: “Derheqê aqûbetê Gulistane de hema tu xeberêke zerrîya ma cinîyan rehet bikero nêameya dayîş. Rojê vîyarte de hewteyêk de 8 cinî ameyî qetilkerdiş. Pêwa nê nê cinî hetê camêrdê ke nêzdîyê xo yê mêrde yan embazê ke înan reyde zewicnayeyê yenê qetilkerdiş. Binê nameyê namûsî de cinî yenê qetilkerdiş û meşrûkerdiş. La qetilkerdişê tu ganeyî meşrû nîyo û nêeşkeno bêro meşrûkerdiş.”

 

‘Semedê Gulistan Doku çi ame kerdiş?’

 

Endama Meclîsê Şaredarîya Tuşbayî Leyla Çelîk zî wina vat: “Gulistan Doku ça de ya, çi bi Gulistane ame kerdiş, cipersayîş de çiqas averşîyayîş virazîya? Demê peyîn de şîdetê serê cinîyan zaf zêde bîyo. Wexto ke ma vanê şîdet, ma tenê qalê şîdetê fîzîkî nêkenê. Ma qalê psîkolojîk, mobîng, cuya xebate, raşteyê cuya keyeyî kenê. Cinî her cayî de şîdet vînenê. Ganî hemverê nê hêrişan de û nê şîdetê serê cinî de, her demî wetayîr rêxistinbîyayîş bibo. Cinî do tu wext tenê nêmanê. Ganî ma nê hetî ra xo rêxistin bikerê. Semedê yewîye ganî cinî paştdayîş bidê yewbînan û xo rêxistin bikerê.”