MERKEZÊ XEBERAN - TAJÊ derheqê fermana 3ine Tebaxa 2014ine dosyayêke Serekwezîrê Iraqî û ê welatan rê şirawit je ferman sey jenosîd qebûl kerdê û waştişê muhakemekerdişê sûcdaran û bicaardişê edaletî kerd.

 

Têgêrayîşê Azadiya Cinîyanê Êzidîyan (TAJÊ) semedê muhakemekerdişê PDKyî û berpirsîyarê fermanê 74ine ê serê komelê êzidî pê ame, dosyayêke serê kerdişê PDKyî de amade kerd û welatê ke jenosîdî nas kerdî, Dadgeha Heqê Merdiman ê Ewropa (DMME), serekwezîrê Iraqî Mihemed Şiya Sudanî û Wezîrê Karê Teberî yê Elmanyayî rê şirawit. Pêwa dosya mektubêke sebebê şirawitişê dosya ci de yeno qal kerdiş zî ame mojnayîş.

 

Mektube TAJÊ de nê çî ameyî vatiş:

 

"3yê Tebaxa 2014ine de komelê ma yê êzidî de ferman rawuşt. Çeteyê DAIŞî Şengal de bi hawayêkê tewr hovane hêrişê komelê êzidî kerd û ferman pê ardî. Nê fermanî de nêzdîyê 7 hezar kesî ameyî remnayîş ke xeylê înan cinî û tutî bî. Nê kesê ke DAIŞî înan remnayî ferman de nêzdîyê 3 hezar û 600 kesî ameyî xelisnayîş û nêzdîyê 2 hezar û 500 vînî yê û çarenûsê înan dîyar nîyo. Çeteyê DAIŞî bi hezaran merdimê Êzidî kiştiş û kerdî gorê komî. Mîyanê 10 serran de 92 gorê komî ameyî vînayîş û hîn bi desan ke nêameyê vînayîş est ê. 56 gorê komî ameyê akerdiş, nê gorê ke ameyê akerdiş, zêdeyêrî 700 cenaze ameyê vetiş. 242 cenaze ameyê naskerdiş û hetê keyeyê înan ra ameyê definkerdiş.

 

10 serrî serê fermanî ra derbaz beno. Ma zanê ke mîyanê nê 10 serran de serê sedemê bingehîn ê fermanê 3yê Tebaxa 2014ine de xeylêk cigêrayîş ameyê kerdiş. Pêwa nê cigêrayîşan de zî çeteyê DAIŞî û sûcdarê jenosîdî nêameyê muhakemekerdiş û edalet pê nêameyo. Semedê êzidî fermanê neweyî ra bêrê xelisnayîş û pawitiş, ganî edalet pê bêro. Çeteyê DAIŞî û hemkarê înan dadgehêk mîyanneteweyî de bêrê muhakemekerdiş. Semedo ke rastî nêrê vînîkerdiş û hesab sûcdarê fermanî bêrê persayîş, ma dosyayek amade kerd. Ma şima ra waştiş kenê ke şima na dosyaya ma verê çiman ra derbaz bikerê.”