WAN - Dengbêje Mukaddese ke Wan de ciwîyena, bale ant serê teda û zordarîya dewlete ya serê ziwanê kurdkî yê verê ra heta nika û vat, “Hêrişê hukmatî hemverê pêro çîyanê ma yê. Problemê înan ziwanê ma yo. Derdê îqtidarî ziwanê ma yo. Ê nêeşkenê ziwanê ma qebûl bikerê."

 

Dengbêje Mukaddese ke Wan de ciwîyena, derheqê tedayê zîhniyetê serdestî yê camêrdan ê serê cinî û hunerê cinî û bêtehamulîyê hukmatî yê hemverê ziwanê kurdkî ajansê ma rê qisey kerd.

 

'Hewl danê ma çin bikerê'

 

Dengbêje Mukkaddese wina qal kerd: "Nê rojan de dawetê ma hewteyêkê, des rojan, reyan zî vîst rojan û heta çewres serran dewam kerdêne. Govende ameyîne gêrnayîş û deyîre ameyîne vatiş. Yanî yew sebebê ke ziwanê kurdkî heta roja ma ya ewro mendo zî dayîkê dengbêj ê. Dengbêjan nê çî heta ewro nêardibî, ewro ma nêbîne. Îqtîdar ewro hewl dano ke ma çin bikero, ma seba ziwan, welat û bîyayîşê xo têkoşîn kenê. Nîyetê înan çinkerdişê ma yo."

 

'Cinîyê kurdî heta roja ewro têkoşîn kerdî'

 

Mukaddese wina dewam kerd: "Komelî de ameyîne vatiş vengê cinîyêke gunay o ke camêrd bieşnawo. Eke goşdayîşê vengê cinîyêke guna yo, o wext qey guna nîyo ke vengê camêrdêkê bieşnawo? Homa cinî û camêrdî sey yewbînan awan kerdo û tu kes kesî ra serdest nîyo. Çira Homa camêrdan efû keno la cinîyan efû nêkeno? Barê giranî her tim milê dayîk û cinîyan ser o. Cinîyê kurdî nê pêro zehmetîyê cuye û heta roja ewro têkoşîya yê."

 

Şarê kurdî do her tim ziwanê xo bipawo

 

Mukaddese da zanayîş wexto ke lazim bikero şarê kurdî çar parçeyan û hemverê çar dewletan têkoşînê xo bi kerra û daran dewam kena û dîyar kerd ke dewlete bi tank û topan nêeşkena şarê kurdî bero. Mukaddese mesaj da ke heqê kurdan o û do her tim ziwanê xo bipawo.

 

'Mi sey deyîrbaze hîs kerd'

 

Mukaddese, wina qal kerd: “Cinî hem çimanê camêrdan de hem zî çimê komelî de sey kole ameyîne vînayîş. Vatişê dengbêjî yê cinîyan ameyîne vatiş, la mi waşt ez nê deyîran vajî. Tu kes nêeşkeno ke çîyo ke hîs kena vindarno. Çiqas mi bikişê û mi perçe perçe bikerê zî nêeşkenê hîsê zerrîya mi de werte ra wedarnê."

 

12 serrîya xo de şîîrêke 23 riste nuşta

 

Mukaddese vat, 12 serrîya xo de cuya xo ser kompozîsyonêk 23 risteyan viraşta, Mukaddese vat wexto ke 12 serrî bî, sozê pîyê xo ser bi camêrdêk pîlêr zewicnayê. Mukaddese wina vat, “Ez pîyê xo qebûl nêkena. Ez tenê mîyanê na rewşe de nîya, xeylêk kesê sey mi est ê û ez nê çî qebûl nêkena. Serra vîyarte de kanalêk televîzyon de serê zewaca kênayan ê kal û pîran reyde cigêrayîş kerdêne. Nê cigêrayîşan de Wan de 250 kesê ke eynî rewşa mi de bî, estbî. Nê cinîyan reyde pêvînayîş ameyîne kerdiş û nê ser de ameyîne qiseykerdiş. Nê pêvînayîşan de rî û vengê cinîyan ameyîne sansûrkerdiş, la mi nêwaşt ke vengê mi û ne zî rîyê mi bêro sansûrkerdiş û mi înan ra vat ke rî û vengê mi menimnê, semedo ke mi çîyêk şerm nêkerd. Yê ke nê emrî de mi bi kalêk ke 7 tutê ey estbî reyde zewicnabî wa şerm bikerê."