Elfazî Toral

 

STENBOL - Cinîyê ke tewrê çalakîya ‘veng bidê azadîye’ bîyî, dîyar kerdî ke ganî kes hemverê sîstemê tecrîdê Îmraliyî de bêveng nêmano û vatî: “Heta tepişteyê zîndanan azad nêbê, ma do zî azad nêbê. Ganî berê Îmraliyî bêrê akerdiş û muzareke newe ra bêro destpêkerdiş.”

 

Komeleya Paştdayîş û Hetkarîya Keyeyê Tepişteyan ê Marmara (MATUHAY-DER) û merdimê tepişteyan hemverê tecrîd û binpaykerdişan de çarçewaya kampanyaya ‘Abdullah Ocalan rê azadî, problemê kurdî rê çareserî’ do çalakîya ‘veng bidê azadîye’ verê zîndanan de dabî destpêkerdiş û çalakî dewam kena. Çalakî verê Zîndanê Cinîyan ê Bakirkoyî de her hewte dewam kena û eleqeyêk pîl vînena. Caardişê keyfî dewam kenê û heqê tepişteyan bi hawayêk keyfî yenê astengkerdiş. Heto bîn ra polîtîkayê tecrîdî her ke şino giran beno.

 

Cinîyê ke tewrê çalakîya ‘veng bidê azadîye’ bîyî ajansê ma rê qisey kerdî.

 

‘Hemverê sîstemê tecrîdî temaşekerdox memanê’

 

Hemsereka verî ya DEM Partî ya Sultangazî, Zubeyde Înce da zanayîş ke kesê hemverê tecrîdî de bêveng manenê ganî merdimayîyê xo cipersayîş bikerê û wina vat: “Ma her hewte verê zîndanê cinîyan ê Bakirkoyî de yenê têhet. Amancê ma dîyar o. Nê welatî de merdimî vanê maro ke nêdano mi de, wa  hezar serrî biciwîyo. Tîya de tehemulê înan çin o, ma binê versîye de zî rûşê. Zîhniyetêk wina vernîya ma de yo. Îqtîdaro ke wayîrê nê zîhnîyetî yo nêeşkeno çîyêk bido nê welatî.”

 

‘Ganî berê Îmraliyî bêrê akerdiş’

 

Zubeyde wina qedêna: “Kesê ke caardişê hemverê kurdan de nêvînenê ganî wijdanê xo ra bipersê. Heta ke meseleya kurdî çareser nêbo do her tim tesîr şaran ser o bikero. Azadîya Abdullah Ocalanî muhîm a. Ganî tecrîd bêro wedaritiş, berê Îmraliyî bêrê akerdiş. Newe ra diyalogî bêrê destpêkerdiş. Heta tecrîd nêwurzo tu çîyêk sererast nêbebo. Wa kes xo nêxapêno. Ma do bi xoverdayîş ser bi kewê. Ganî kes hemverê polîtîkayê qirkerdişî û hêrîşî bêveng nêmano. Jin jiyan azadî.”

 

Amanc tecrîd û binpaykerdişî yê!

 

Doktor Rukiye Ekenler zî wina vat: “Pêro sazgeh û dezgeyê aştî û azadî ganî hîsgêr têbigêrê. Amancê ma yê ameyîşê tîya oyo ke hemverê tecrîd û xespkerdişê heqan ê zîndanan de hîsgêrî bêro awankerdiş. Ma wazenê bibê vengê tepişteyan û  rayaumûmî awan bikerê. Zîndanan de tepişteyê nêweşî est ê. Derheqê heqê tepişteyan de peymanê ke Tirkîya îmza kerdê est ê la yew zî ca nîno. Tecrîd tenê problemê merdimanê bi hîsgêr nîyo. Ganî tecrîd problemê pêro hêzê demokrasî û welat bêro vînayîş. Ma eşkenê tepişteyan azad bikerê. Ma hewl danê her rojê yewşeme saete 14.00ine de bêrê têhet û rayaumûmî awan bikerê. Heta ke zîndanî azad nêbê ma zî tebera azad nîyê. Ma nê baş zanê. Ma do seba nê têkoşînê xo dewam bikerê.”