AMED - TJA, DBP û DEM Partî derheqê hêrişê hemverê Temsîlkara Sereka Koma DEM Partîye Gulîstan Kiliç Koçyîgît eşkerayîyêke da û vatî: "Bi hêzê ke ma tarîxê têkoşînê cinî gênê, hemverê şerî, şîdetî, zîhniyetê serdestî yê camêrdî, înkar, îmha û asîmîlasyonî têkoşînê xo yê rêxistine pîl bikerê." 

 

Têgêrayîşê Cinîyanê Azadan (TJA), Partîya Herêmê Demokratîke (DBP) û Partîya Têduştî û Demokrasî (DEM Partî), derheqê hêrişê hemverê Temsîlkara Sereka Koma DEM Partî Gulîstan Kiliç Koçyîgît, verê awanîya Rêxistina DEM Partî ya Amedî eşkerayîyêke da çapemenî. Parlamentere Ceylan Akça Cupolo, îdarekarê DBP û DEM Partî yê bajarî û qezayan û xeylêk kesî beşdarî eşkerayîye bîyî. Eşkerayî bi sloganê "Jin jiyan azadî" dest pêkerd. Eşkerayîye hetê aktîvîsta TJAyî Bahar Peker ra ameye wendiş.

 

Sewbîna vernîya eşkerayîye de hemsereka DEM Partî ya Bajarî Gulşen Ozer qisey kerd, hêrişê pê ame şermezar kerd û vat, îqtîdarê AKP-MHPyî nêtersenê û do sere nêtewê. 

 

Bahare wina vat: “No hêriş nîşaneyê polîtîkayê kolonyalîst yê îqtîdarê faşîstî yê AKP-MHPyî yo. Hêrişê hemverê rêhevala ma Gulîstan Kiliç Koçyîgît hêrişêk hemverê îrade, reng, helwest, sîyaset û têkoşînê cinî bî. Ma rayîr nêdanê xespkerdişê îrade, şîdetê hemverê cinîyan, rayîrşîyayîşê bêhuqûqî û metodê teda û zordarî. Ma keye, kuçeyan û meclîsê şîdetê camêrd-dewletî qebûl nêkenê. Ma do têkoşînê xo pîl bikerê. Dewlete bingehêk şîdetê hemverê cinîyan akena, edaletê camêrdî reyde zî polîtîkayê bêcezaverdayîşî kûr kena. Ma do hemverê şîdetê dewlet-camêrdî de bêveng nêmanê û ma do her tim verê cinîyan de bê û têkoşînê xo ra peyser game nêerzê. Bi hêzê ke ma tarîxê têkoşînê cinî gênê, hemverê şerî, şîdetî, zîhniyetê serdest ê camêrdan, înkar, îmha û asîmîlasyonî têkoşînê xo yê rêxistinkerde pîl bikerê." 

 

Eşkerayîye bi sloganê “Ma meclîs de şîdet nêwazenê" û "Jin jiyan azadî" peynî bî.