Rabîa Onver

 

COLEMÊRG - Hevalê têkoşînî yê endamê Meclîsê Dayîkê Aştîye yê Geverî ke serrêke verê dinyaya xo bedelnayî, dîyar kerdî ke ê dayîkê têkoşer her tim xo reyde hîs kenê û vatî, “Ma do her tim serê rêça înan de bê û têkoşînê înan heta peynî dewam bikerê."

 

Dayîkê aştîye ke yewin waştişê înan "aştî" yo, bi serran o bi destbendkerdiş, tepiştiş, ferzkerdişê ajanî û tedayê tewir bi tewir sîstem hewl dani înan peyser bierzo. 5ê Tebaxa 2023ine de merkezê Colemêrgî û qezaya Colemêrgî sereştişê keyan de 23 kesî ameyî destbendkerdiş. Heto bîn ra 22yê Tebaxe de Dayîkê Aştîye Adalet Safalî, Perîşan Akçelîk û lajê aye Cîhan Akçelîk û avûkat Erdal Safalî ke Gever ra seba îfadeyê dozgerî şîyî Colemêrg, wextê ameyîşî de qeza kerdî. Qeza de Dayîkê Aştîye Adalet Safalî, Perîşan Akçelîk û lajê aye Cîhan Akçelîk û avûkat Erdal Safalî dinyaya xo bedelnayî.

 

Endamê Meclîsê Dayîkê Aştîye yê Geverî dîyar kerdî ke ê têkoşînê Dayîkê Aştîye Perîşan Akçelîk û Adalet Safalî yê serrêke verê dinyaya xo bedelnayî, dewam bikerê.

 

'Seba na dewa xo ver danê'

 

Dayîka Aştiyê Gulbeyaz Mîhçi dîyar kerd ke her çend serrî derbaz bîyo zî dejê înan sey roja ewil teze yo. Gulbeyaze vat: “Ê seba ma dayîkê pîroz bî. Nêzana senî şîrove bikerî, la zerrîya înan pêro dej bî. Înan zî seba ke dejê xo xo vîr ra bikerê, têkoşîn kenê. Edalete û Perîşane her tim dîyar kerdî ke ê aştî wazenê. Her tim ma ra vatêne ke hêvîya înan tenê oyo ke Kurdistan azad bibo û tutê ma cuyêka azad biciwîyê. Seba na dewa şer kerdêne. Eke aye biciwîyayîne bîne ke nê rojan tewr baş biciwîyayîne.”

 

'Ma do têkoşînê înan xo vîr ra nêkerê’

 

Gulşen Yilmaz vat, ê Dayîkê Aştîye yê ke dinyaya xo bedelnayê bi rêzdarî yad kenê û wina vat: “Ê dayîkê fedakar û têkoşer bîyî. Belê, beno ke ewro mîyanê ma de nêbê la rêçêke pîle ma rê verdayê. Ma têkoşînê înan dewam kenê. Pêwa sûcê dayîkan çinî bo zî venga înan seba îfadeyî kerdî. Tenê waştişê înan aştî bî, hemverê kesî şer nêkerdêne. Xeyalê înan azadîya Kurdistanî bî. Seba xelasîya Kurdistanî ke waştişê înan o, çi destê ma ra bêro ma do bikerê. Çîyo ke dayîkan rê ame kerdiş, ma do tu wext xo vîr ra nêkerê. Heta bedenê ma sax bo ma do înan û têkoşînê înan xo vîr ra nêkerê.”