Gulîstan Gulmuş

 

AMED - Hemşaredara Yenîşehîrî ya Amedî Safîye Akdag da zanayîş ke dimayê texrîbatê qeyûman do cuyêke newe awan bikerê û nê zî do bi serkêşîya cinî bikerê û vat: "Seba karê nîmced mendê no destpêkêk bî. Ma do nê temam bikerê.”

 

Îqtîdarê AKP-MHPyî yewin rey 2016ine de qeyûm tayînê şaredarîyan kerd û ewil sazgehê cinîyan û kulturê hedef girewt. Dimayê tayînkerdişê qeyûman xeylêk projeyê nê raşteyan nîmcet mendî. Weçînayîşê herêmî yên 2024ine de Partîya Têduştî û Demokrasî (DEM Partî) şaredarîyê ke qeyûm girewtî, projeyê nîvcet mabî, newe ra dayî destpêkerdiş. Şaredarîya Yenîşehîrî ya Amedî çarçewaya nê de xebatê xo da destpêkerdiş. Şaredarîya Merkezê Şêwirmendîyê Cinîyan ê Binevş ke plan kerdêne 2019ine de abikerê la dimayê qeyûman nîmced mendibî, 17ê tebaxe de akerd.

 

Hemşaredara Yenîşehîrî ya Amedî Safiye Akdag, derheqê Merkezê Şêwirmendîyê Cinîyan ê Binevşe û xebatê cinîyan de qisey kerd.

 

‘Hewl danê vernîya ma bigîrê’

 

Safiye da zanayîş ke projeyê Merkezê Şêwirmendîyê Cinîyan ê Binevşe 2019ine de ameyo amadekerdiş û vat: “Wexto ke ma ameyî wezîfe bi nameyê Bînevşe ma qerar girewt. La çi heyf tayînkerdişê qeyûman reyde heqî ameyî xespkerdiş. Nê semedî ra nîmcet mend. Ma do karê xo yê nîmcet mendê temam bikerê. Qeyûm senîn amebî hêrişê sazgehê cinîyan kerdibî. Hêrişê sazgehê ma kerdibî. Nê semedî ra seba ma taybet û muhîm bî. Texrîbatêk pîl verdabî. Bi 4 aşmî yo ma wezîfeyê xo ser de yê. Bi xeylêk astengîyan wazenê vernîya ma padê. La pêwa pêro bêîmkanîyan ma xebatan kenê.”

 

‘Ma eşkenê cuya newe pîya awan bikerê’

 

Safîye wina qedêna: “Texrîbato tewr pîl sazgehê cinîyan pê ameyê. Ez venga pêro cinîyan kena. Tenê  cinîyanê kurdan rê nê pêro kesî rê berê ma akerde yê. Seba pêro cinîyê nê bajarî berê ma akerde yê. La ganî wayîrvejîyayîşêk bibo. Xebatê ma seba înan ê. Ganî ma xebatê xo pîya bikerê û pîya rêxistin bikerê.  Bi no hawayî ma eşkenê cuya newe awan bikerê. Serkêşîya cinîyan seba ma muhîm a.”