Nazlican Nujîn Yildiz

 

ÎZMÎR - Hemsereka ÎHDyî ya Îzmîrî Zîlan Gumuş derheqê binpaykerdişê heqan de qisey kerd û da zanayîş ke tecrîdê Îmraliyî tesîr pêro zîndanan ser o kerdo û ganî hemverê nê de veng bêro vetiş. Zîlane vat, seba aştîyêke mende ganî peynîya tecrîdî bêro ardiş.

 

Rayberê PKKyî Abdullah Ocalan ke zîndanê Asayîşê Berzî yê Tîpê Fyî yê Îmraliyî de tepişte yo, 41 aşmî yo agahî nîna girewtiş. Seba tecrîdê Abdullah Ocalanî ser o bêro wedaritiş û azadîya fîzîkî pê bêro û sewbîna seba çareserîya problemê kurdî, 10ê teşrîna verêne 2023ine de kurdî û dostê kurdan kampanyayêke dayî destpêkerdiş. Bi waştişê ‘Abdullah Ocalanî re azadî, problemê kurdî rê çareserî’ tepişteyê siyasî 27ê Teşrîna Peyêne 2023ine de kewtî grevê vêşanîye. Dima ra merdimê tepişteyan zî bi eynî waştişî çalakîya ‘Nobeta Edaletî’ dayî destpêkerdiş. Dima ra tepişteyan boykotê pêvînayîşî kerdî. Çalakî demêk derg dewam kerd. Na çarçewa de xoverdayîşê tepişteyan û merdimê tepişteyan dewam keno.

 

Hemsereka Komeleya Heqê Merdiman (ÎHD) ya Îzmîrî Zîlan Gumuş qisey kerd û da zanayîş ke îqtîdar seba tecrîd û binpaykerdişê heqan çareserîyêk nêano û bale ant serê muhîmîyê têkoşînî hemverê tecrîdî. Zîlane vat, seba aştîyêke mende, ganî tecrîd peynî bo.

 

‘Çareserîyêk mende nêard’ 

 

Zîlane vat, binpaykerdişê heqan yê zîndanan tarîxê komare reyde destpê kerdo û vat: “Awanbîyayîşê komare ra heta nika teda serê zîndanan de est o û hukmatan tu çareserî pê nêard. Tirkîya de zîndanî açeryayê merkezê binpaykerdişê heqan. Ma sey komele, sey komîsyonê zîndanan aktîf xebityenê. Ma waştiş û muracatan gênê û tepişteyan reyde pêvînayîşan kenê. Ma eşkenê vajê ke rewşa zîndanan qet baş nîya.”

 

‘Îqtîdarî bivuryê zî yewin çîyo nêvuryayo bêtêduştî ya’

 

Zîlane wina dewam kerd: “Bêtêduştî welatîjî kûrî ra hîs kenê. No tewr zêde zîndanan de yeno vînayîş. Ma esasê muracatan de eşkenê vajê ke bi taybetî bêtêduştî hemverê tepişteyê sîyasî kenê. Tepişteyê nêweşî est ê. Tepiteyê ke heqê înan dest ra ameyê girewtiş est ê. ATK raporan awan keno û vano ‘no tepişte seba komelî tehluke yo.’ Bi nê raporan tepişteyî nînê veradayîş. Hemverê tepişteyan de bêtêduştîyêke pîl est a. Nimûneyê ewilî ke tecrîd ci de bi giranî pê ameyo zî Îmrali yo. Nika wazenê pêro zîndanan de tecrîd pê bêro. La seba aştîyêke mende ganî tecrîd peynî bo. Eke ma biwazê aştî bîyarê, ganî ma fek ziwanê bêtêduştî vera nêdê. Ganî tecrîd bêro wedaritiş.”