WAN - Cinîyan seba Mîtîngê Aştîye ke 1ê êlule Roja Aştîye ya Dinya de do bêro organîzekerdiş, venga  tewrbîyayîşî kerd. Cinîyê ke venga tewrbîyayîşê mîtîngî kerdî bale antî serê muhîmîyê aştîye seba cuyêka bi rûmet û azad.

 

Bi wesîleya 1ê Êlule Roja Aştîye ya Dinya do Parkê Musa Anter de Mîtîngê Aştîye bêro organîzekerdiş. Cinîyan dîyar kerdî ke ê do reyke bîn wareyan ra  venga aştîye bikerê, vatî ke ê bi taybetî paweyê tewrbîyayîşê cinîyan ê û vatî ke ê aştîye de bi israr ê. 

 

'Berpirsîyarîyê aştîye wezîfeyê herkesî yo'

 

Hemseroka  Partîya Têduştî û Demokrasî (DEM) a Wanî Gulşen Kurt, dîyar kerd ke bi serran o hemverê îqtîdarî de mîyanê têkoşînî de yê û vat: “Ma hemverê polîtîkayê xitimnaye yê welatî, hem hetê ekonomî de, hem zî hemverê bêkarî de, feqîrî, qetlîamê cinîyan û talankerdişê xoza têkoşîn kenê. Sey cinî sere de seba çareserîya problemê kurdî bi metodê demokratîk û wedartişê tecrîdî lezkî demî de ma her ware û her cayî de têkoşînê xo dewam kenê. Na çarçewa de ma pêro şarê xo ra hêvî kenê ke 1ê êlule de seba pawitişê aştîye vejîyê raşteyan ke aştî lezkî bêro. Aşitîya na herre berpirsîyarîya her kesî ya, tenê şarê kurdî nîya. Ganî pêro şarê Tirkîya aştî bipawo. Ma paweyê pêro şarê Wanî û komê hîsgêr ê ke bêrê tewrê Mîtîngê Aştîye ke do 1ê Êlule de Parkê Musa Anterî yê Wanî bêro organîzekerdiş bibê.

 

'Cinî aştîye de israr kenê'

 

Çalakîkera Têgêrayîşê Cinîyanê Azadan (TJA) Xecê Oktay zî wina vat: "Aştî tenê vindarnayîşê şerî nîya, aştî eynî wextî de waştişê cuyêka bi rûmet a û înşakerdişê ameyoxêke azad a. Ma vengê xo hemverê şerî berz kenê ke ma aştî wazenê. Ma paweyê pêro cinîyanê ke 1ê Êlule de bêrê Parkê Musa Anterî tewrê mîtîngî bibê."

 

'Ma wareyan de muhîmîyê aştîye bîyarê ziwan'

 

Hemsereka Qezaya Rêya Armûşî ya Partîya Herêmê Demokratîke (DBP) a Wanî Dîlan Çelîk bale ant muhîmîyê aştîye ser ê seba cuyêka bi rûmet, têduşt, azad û demokratîke û vat: “Seba reyke bîn muhîmîyê aştîye bîyarê vîr, ma 1ê Êlule Roja Aştîye ya Dinya de saete 17.00ine Parkê Musa Anterî de pabeyê pêro şarê xo yê, bi xususî cinî û ciwanî wa tewrê mîtîngî bibê."