Mîdye Miqted

 

HELEB - Cinîyê Helebî derheqê 1ê Êlule Roja Aştîye ya Dinya de dîyar kerdî ke ê hemverê şerî her tim têkoşînê cuye danê, sewbîna hemverê şerî de aştîye wazenê û wina vatî: "Ma aştîye reyde yê. Ma wazenê projeyê ma yê aştî dinya de vila bibê. Ma wazenê dinya de aştî vila bibo, dişminîyê hemverê şarê kurdî nê.”

 

Bi nêzdîbîyayîşê 1ê Êlule Roja Aştîye ya Dinya çalakîyê seba na rojê zî dewam kenê. Labelê nê reyde hêriş, şer, şîdet û binpaykerdişê heqanê cinîyan zî dewam kenê. Bi xususî Rojhelatê Mîyanên de nê hêrişî hîna zêde dewam kenê. Têkoşînê şarê kurdî yê hemverê nê hêrişan zî dewam kenê.  

 

Henîfa Mihemed û Henîfe Hajî derheqê 1ê Êlule Roja Aştîye ya Dinya de ercnayîş kerd.

 

'Ma şer nêwazenê'

 

Henîfa Mihemed da zanayîş ke her tim hetê aştîye yê, ê şer nêwazenê û wina vat: "Ma şarê kurdî destpêkê ameyîşê ma yê serê rîyê dinya her tim ma mîyanê şeran de bîyî. Tenê ma nê, labelê rayberê ma zî rojêke aştî nêdî û bi 26 serrî yo mîyanê zîndanî de ameyo tepiştiş. Ma çi sûc kerdibi? Ewro hemverê şarê kurdî de hende dewletî yewîya xo awan kenê, semedê çi? Çira nêwazenê ma aştîye reyde rojêke biciwîyê? Ewro ancî şerê ma yeno kerdiş. Ma zî mecbûr manenê ke xo bipawê. Ma şer nêwazenê. "

 

'Ma aştîye reyde yê, şerî reyde nîyê'

 

Henîfe Hajî zî da zanayîş ke ê aştîye reyde yê û vat: "Ma roja aştîya dinya de pêro şarê xo yê kurdî pîroz kenê û ma danê dîyarkerdiş ke bi taybetî roja aştîya dinya de ma zî hemverê şerî û alozîyan ê. Rayberê Şarê Kurdî Abdullah Ocalan bi azadî û aştîye veng da û waştişê o bî ke dimayê hende şer aştî û silametî dinya de awan bibo. La o zî heta nika tepişte yo û hîrê serrî yo tu agahî ci ra nîna girewtiş. Sewbîna qedexe yo ke Rayberê ma bi keye û avûkatanê xo reyde pêvînayîş bikero. Ganî serdayîşê Rayberî bêro kerdiş û tewr tay rewşa ey şarî rê bêro zelalkerdiş."

 

Tewr peyîn Henîfe vat: "Ma aştîye reyde yê. Ma wazenê projeyê ma yê aştîye dinya de vila bibo. Ma wazenê dinya de aştî vila bibo, dişminîyê hemverê şarê kurdî nê.”