WAN - Ver bi 1ê Êlule Roja Aştîye ya Dinya cinîyê wanijî qisey kerdî û mesajê sey,  ‘Aştî babeta vatişî nîya, ma mîyanê şerî de yê. Ma şer nêwazenê. Şer tewr zêde tesîr cinîyan û tutan ser o keno’ dayî.

 

1ê Êlule Roja Aştîye ya Dinya rê rojêke mend û Tirkîya û Kurdistan de bi desan serrî yo pêwa ke têkoşîn yeno dayîş, aştî pê nêameya. Beşêk merdimê ke bi hêvîya aştî ciwîyenê, beşêk zî hêvîya xo vînî kerdê.  Polîtîkayê îqtîdarî yê şerî her ke şinê giranêr benê û aştîye zî tarîtî de verdeno. Hawirê şerî zî pêro wareyê cuye açarnayo kaos.

 

Cinîyê Wanî vernîya 1ê êlule ajansê ma rê qisey kerdî.

 

‘Aştî babeta vatişî nîya’

 

Cinîya bi nameyê Kadere da zanayîş ke welat de aştî çin a û aştî aramîya komelî ya. Kadere wina vat: “Aştî aya ke merdim mîyanê hizûrî de biciwîyo. Şerê mîyanên est o. Şerê Israîl- Fîlîstînî est o. Aştî babeta vatişî nîya. Aştî seba komelî xeylêk muhîm a. Tirkîya de aştî çin a. Bi no hawayî zî Tirkîya aver nêşina. Ameyoxêk ma yê baş çin o.”

 

‘Ma mîyanê hawirê şerî de yê’

 

Rozerîn Demîr zî vat, aştî yena manaya cuyêka aram, cuyêka cinî û tutî nînê qetilkerdiş û wina vat: “Her kes bi dişminî yewbînan rê ewnîyeno. Nê semedî ra aştî mumkin nîya. Ma zî hawirê şerî de yê. Ma nêeşkenê fikr û fehmê xo vajê. Ma nêeşkenê heqê xo bipawê û vajê ke ma kurd ê.”

 

‘Wa şer çinî bo’

 

Cinîya bi nameyê Munnevver Başkurt zî dîyar kerd, şer çîyêk baş nîyo û vat: “Seba aştî pê bêro, ganî şarê kurdî yew bo. Ma heqê xo wazenê. Ma şer qebûl nêkenê. Pêro kesê wayîrê wijdanî ganî şer qebûl nêkerê. Ganî her kes reaksîyon şerî rê bimojno.”

 

‘Tewr zêde cinî û tutî tesîr benê’

 

Cinîya Sema Kiyag zî vat, ganî aştî pê bêro, cinî û tutî, merdimî nêbermê û vat: “Cinî seba fikrê xo binê teda de yê. Cinî wazenê cuyêka arame biciwîyê. La serê cinîyan de şero tewr pîl yeno ciwîyayîş. Tewr  zêde cinî û tutî tesîr benê. Tewr zêde cinî zirar vînenê. Ganî şer bêro vindarnayîş û aştî pê bêro.”