ŞIRNEX- Waya tepişteya nêweşe Nudem Durak, Aynur Ozar da zanayîş ke zîndanan de tepişteyan ser o tecrîdêk giran pê yeno û wina vat: “Ma wazenê Nudeme bêro veradayîş û newe ra ma rê deyîran vaja. Ma bi hesreta vengê aye yê.”

 

Zîndanan de binpaykerdişî her ke şino zêde benê. Yew zî tepişteya nêweşe hunermende Nudem Durak ya ke 2015ine de Şirnex de ameye destbendkerdiş û tepişteye ya. Nudema ke zîndanê Amed û Mêrdînî de mende, dima ra surgunê zîndanê Bayburtî kerdî. Nudeme nêweşa graves (guatrê jehrî) ya. Waya aye Aynur Ozar derheqê rewşa waye xo de qisey kerd.

 

‘Rojanê zehmet ciwîyena’

 

Aynure wina qal kerd: “Rojêke vatî ceza Nudeme rê ameya. Ez şaş menda. Nudeme kesêke derse dayîne. Mi vat na çi ceza ya? O wext rewşa keyeyê mi baş nêbî, nêeşkayîne esntruman aye rê bigirewtêne. Bi giştaneyê ma mi xo rê gîtar girewte. Dima ra ceza aye rê ameye birnayîş û ameye tepiştiş. Berdîya zîndanê Mêrdînî. Ma şîne pêvînayîşê aye. Dima ra berdî zîndanê Bayburtî. Dadîya mi nêweş a. Nêeşkena raywanî bikera. Ma wazenê Nudeme bêro veradayîş. Nêweşîya giran a guatrî aye reyde est a. Dermanê ke danê baş nêkenê. Dermanê aye qels manenê.”

 

‘Wa bêro veradayîş’

 

Aynure dewam de wina vat: “Ez paştdayîş dana dayîkê ke verê zîndanî de yenê têhet. Seba tutanê xo nobete gênê. Wa peynîya nê îşkenceyî bêro. Wa tutê înan bêrê veradayîş. Dayîkî seba nê têkoşîn dewam kenê. Zîndanan de tecrîdêk giran est o. Ganî no tecrîd bêro şikinayîş. Ez venga hunermendanê tirk û kurdan kena. Wa paştdayîş bidê Nudeme. Vengê Nudeme vengêke bi erj o.  Yê ke vengê aye bieşnawê do biwazê bêro veradayîş.”

 

‘Veranêdanê zî wa bîyarê cayêk nêzdî’

 

Aynure tewr peyîn wina vat: “Roja ke berdîyaya Bayburtî, ma nêeşkenê şêrê bivînê. Wa Nudeme bêro veradayîş. Wa Nudeme deyîranê xo vaja. Ma hesreta vengê aye yê. Ez venga kesê ke cezaya aye tesdîq kerdê kena. Wa destê xo bidê wijdanê xo ser. Nudeme berdî Bayburt. Ma nêeşkenê şêrê û bêrê. Her hetî ra ma dano zor. Wa Nudeme vera bidê, eke vera nêdanê zî wa bîyarê cayêk nêzdî.”