STENBOL - Cinîyan reaksîyon hemverê qetilkerdişê cinîyan ê her ke şinê zêde benê, mojnayî û dîyar kerdî ke qetilkerdişê cinîyan hêrişêk hemverê azadî û ercan o. Cinîyan vat hemverê nê qetilkerdişan ganî vindertişêk rêxistinkerde bibo.

 

Qetilkerdişê cinîyan, desteştiş, şîdet ke yew polîtîkayê îqtîdarî yo roj bi roje zêde beno û şikdarê ke polîtîkaya bêcezaverdayîşî ra cesaret gênê cinîyanê nêzdîyê xo qetil kenê. Hetê şîdetî Tirkîya de çapemenî de bêro vînayîş zî bi hezaran qetilkerdişê cinîyan ê rayaumumî de nînê vînayîş û yenê nimitiş est ê. Cinîyê ke binê lepê şîdetî de qetilkerdişî reyde yenê rî bi rî, heto bîn ra hemverê qetilkerdişan têkoşîn berz kenê.

 

Cinîyan derheqê şîdet û qetilkerdişî de JINNEWSî rê qisey kerdî.

 

‘Hêrişê hemverê cinîyan hemverê erjan o’

 

Zeynep Can da zanayîş ke ganî qetilkerdişê cinîyan ‘normal’ nêrê destgirewtiş û vat cinî awankerdoxê cuya komelî yê û vat: “Cinî awankerdoxê ekonomî, kede yê. Seba nê wexto ke cinîyêke yena qetilkerdiş esas de nê ercî yenê qetilkerdiş. Ez normalkerdişê ci raşt nêvînena. Ganî ma cinî pêro komel vera nê reaksîyon bimojnê.”

 

‘Nê welatî de heq, huqûq, edalet çin o’

 

Temsîlkara DEM Partî ya Kartalî Zeynep Dîcle zî wina vat: “Hemverê polîtîkayê îqtîdarî têkoşînê cinîyan dewam keno. Cinî hem kuçeyan de hem keyeyan de yenê qetilkerdiş. Binê serdestîyê camêrdî de dewamkerdişê cuye zehmet bîyo. Ganî cinî azad bê, azad têbêgêrê, berarde bê. Nê welatî de huqûq, edalet, heq çin o. Ganî hemverê bêedaletî yewîye bibo. Ganî rêxistinê cinîyan bêrê xurtkerdiş.”

 

‘Heta cinî azad nêbo komel zî azad nêbeno’

 

Îdarekara DEM Partî ya Kartalî Nebahat Çavdar zî wina vat: “Qetilkerdişê cinîyan parçeyêk polîtîkaya dewlete yo. Heta komelî de cinî azad nêbo, komelî zî azad nêbenê. Wa dewlete polîtîkayê xo ma ser o bianco. Ma do hemverê nê de bê. Ma azadîye wazenê. Ganî pêro cinî bibê yew. Ganî ma xo bipawê û têkoşînê xo berz bikerê.”