Gulîstan Gulmuş

 

AMED- Avûkate Zeynep Karayilan da zanayîş ke binpaykerdişê heqan ê zîndanan her ke şino zêde beno û sey nimûneyê tewr peyîn zî ‘tepişteyê nêweşî yê zîndanê Tîpa F yê Kurkçukarî ke 3 serrî yo nêeşkenê şêrê nêweşxane’ mojna.

 

‘Vernîya komelbîyayîşî padanê’

 

Zeynepe dîyar kerd ke tewr peyîn zîndanê cinîyan ê Amedî muracat kerdo û wina vat: “Zîndanî seba cinîyan zaf zehmet ê. Zîndan de cinîyê personelî zî caardişê zîhnîyetê camêrdî de yê. Dekewtiş û vejîyayîşî de cigêrayîşê zitî yeno ferzkerdiş. Pedê hîjyenî nêdanê cinîyan. Tenê pedêk yeno dayîş. La pedî qet bi kalîte nîyê. Cinî nêweş kewenê. Werdî baş nîyê. Demê peyîn de jehrbîyayîş zêde yo. Destur nêdanê wareyê hempar, sohbet û sporî. Qursî est ê la qursan zî saetê ke pêvînayîşê keyeyan de, pê anê.”

 

‘Tepişteyêke cilanê xo yê kanî ra mînder viraşta cipersayîş’

 

Zeynepe wina dewam kerd: “Tepişteyê ke tarîxê înan yê ‘bi şert veradayîş’ ameyo hetê heyetê îdarî û taqîbkerdişî ra bi persê ‘ti poşmanê/a’, ‘derheqê Abdullah Ocalanî de çi fikrîyenê/a’, ‘ti vejîyê teber se bikerê?’ Yenê rî bi rî û tahliyeyê înan yeno astengkerdiş. Veradayîşê bi kontrolî 3,6 heta serrêke yenê taloqkerdiş. Hewl danê hêvîya tepişteyan bişkinê û dej bidê antiş. Eynî wextî de derheqê veşnayîşê înfazan de cezayê hucreyî zî yenê dayîş. Nimûne, tepişteyêke cilanê xo yê kanî ra mînder viraşta û tepişte rê cipersayîş ame akerdiş.”

 

 ‘Ganî zîndanî kontrolî rê bêrê akerdiş’

 

Zeynepe wina peynî kerd: “Seba zîndanan tewr zêde lazimî bi çalakîyan û paştdayîşî est a. Her hewte muracatê wezaretê edaletî yeno dayîş. 22ê Çeleyî de 330 avûkatî, seba peynîkerdişê tecrîdê Abdullah Ocalanî ser o muracat kerdî. Vatî zîndanan de tecrîd çin o û cewab nêdayî. La tecrîd zîndanî derbaz kerdo û tesîr pêro komelî ser o kerdo. Hemverê nê de ganî têkoşînêk topyekun bibo. Ganî tenê tepişte û merdimê înan nê, ganî her kes têkoşîn bikero. Ganî zîndananî kontrolî rê bêrê akerdiş. Ganî pêro mekanîzmayê netewî û mîyanneteweyî wezîfeyê xo bîyarê ca.”