Nazlican Nûjîn Yildiz

 

ÎZMÎR- Sekretera cinîyan ê şubeyê hûmara 1ine Egîtîm Senî ya Îzmîrî Şengul Bîrgul da zanayîş ke heqê pewerdeyê bi ziwanê dayîke, heqo tewr seryîn o û vat: “Astengkerdişê nê heqî dir komel û kesî çin yenê hesibnayîş. Şengule dîyar kerd ke do seba heqê perwerdeyê bi ziwanê dayîke, her tim her cayî de mîyanê têkoşînî de bê.”

 

‘Heqo tewr sereyîn o’

 

Şengule wina dîyar kerd: “Ganî tu kes ziwanê xo ra bêpar nêro verdayîş. Ziwanê dayîke nasname, şexs, averşîyayîşê hîsî û zîhnê merdimî yo. Astengkerdişê heqê perwerdeyî yê bi ziwanê dayîke, yeno manaya ke ê merdimî teberê mektebî de ameyê verdayîş. Yanî tut/e do teberê mektebî de baş bifikrîyo la mektebî de bibo şexsêk bîn. No zî rayîr vernîya endîşe, çinbîyayîş, ters, hêrs, şerm, xemgînî akeno. No do rayîr ver bi nefretî abikero.”

 

‘Seba wendekaran travma yo’

 

Şengule wina dewam kerd: “Perwerdeyê Tirkîya bi yew ziwanî yo û no her kesî dano zorî. Ziwanê mi kurdkî yo. Heta mektebê sereyîne ma kurdkî qisey kenê. Mi dest bi mektebî kerd, ziwanêk bîn reyde ameya rî bi rî. No seba mi travmayêk pîl bî. Ez zaf mektebî ra tersabîya. Mamosteyê mi baş bî. Xêrê ey rê mi mektebî ra hes kerd. No bi raştî seba tutan travma yo. Asîmîlekerdişê wendekar tu feyde nêdano dewlete. Çinhesibnayîşê keye, kes, asîmîlekerdiş yan zî entegrekerdiş tu feyde nêdano dewlete.”

 

‘Perwerdeyîyêk baş’

 

Şengule vatişê xo wina qedêna: “Ganî mamosteyî her platformî de heqê pewerdeyê bi ziwanê dayîke bîyarê ziwan û sendîka û sazgehê komelê sivîlî zî na rewşe bikerê rojeve. Seba no çapemenî de zî ca bigîro ganî ma têkoşîn bikerê. Ganî ma verê mekteban de, verê wezaretî de eşkerayîyan bidê. Ganî ma seba perwerdeyê bi ziwanê dayîke her tim hewl bidê. Sey Egîtîm Senî metodê ma yê tewr muhîm perwerdeyîyêk zanistî û bi ziwanê dayîke yo. Ma do nê her tim bîyarê ziwan.”