WAN- Endama Meclîsê Şaredarîya Tûşbayî Nazmiye Acar derheqê xebata cinîyan de qisey kerd û vat: “Wexto ke ma şaredarî girewt, şaredarî de nameyê cinî zî çinbî. Masaya ma ya more ya wareyê şîdetê cinîyan ser de est a ke ma çarçewaya Mudûrîyê Cinîyan de viraşt û uca ra muracatan ma gênê. Ma plan kenê ke Baxçeyên Cinîyan ê bajarî abikerê.”

 

Şaredarîya Tûşba ke binê îdarekarîya Partîya Têduştî û Demokrasî  (DEM Partî) de ya, weçînayîşê herêmî yê 31ê Adare de se ra 55,52 rayî bi dest kerd. Şaredarîya ke Partîya Demokratîke Şaran (HDP) weçînayîşê herêmî yê 31ê Adara 2019ine de se ra 52,93 rayî girewtî, mazbata hemşaredaran rê nêame dayîş û şaredarî teslîmê AKPyî ameye kerdiş. Şaredarîya ke binê îdarekarîya AKPyî de bî tu xebate seba cinîyan nêameye kerdiş, dimayê ke DEM Partî şaredarî bi dest kerd, dest bi xebatê seba cinîyan ame kerdiş.

 

Endama Meclîsê Şaredarîya Tûşbayî Nazmiye Acar qalê xebatê ke seba cinîyan kerdê û do bêrê kerdiş, kerd.

 

'Şaredarî de nameyê cinî zî çinbî’

 

Nazmîya qalê prosesî kerd û wina vat: “Vernîya ma Midûrîyê Cinîyan zî çinbî. Şaredarî wareyêk ke tewr zêde lazimîyê cinîyan pê est a ya û pêwa nê zî seba cinîyan tu çî nêameyo kerdiş. Ma sere de serê cinîyan de dest bi xebatan kerd û dima ra îdarekarîyê xo yê cinîyan awan kerd. Seba ke ma fam kerf ke  seba tedbîrê teserûfî yê vernîya ma tîmêk ke karê cinîyan bikero çin o. Nê semedî ra ma serê pêşnîyazîyê  embazanê xo mudirîyê xo yê cinîyan awan kerd.”

 

 

'Ma sûke de seba cinîyê ke berardişê xo yê destkarî biroşê cayêk akerd'

 

Nazmîye, dîyar kerd ke seba cinîyan sûke de ware akerdê û vat: "Wexto ke Bazarê ma yê Bedestenî yê ke ma verê qal kerdibi bêro akerdiş, do uca de seba cinîyan wareyêk bêro dîyarkerdiş û ê do cinî bi rotişê berhemê ke bi destê xo amade kerdê, keye de debara xo bikerê."

 

 'Kesê tewr dezavantaj cinî û tut ê'

 

Nazmîye derheqê xebatê xo yê seba tutan zî wina vat: “Tûşba de bi pêroyî 61 taxê ma est ê. Ma plan kenê ke her hewte taxêke festîvalê tutan organîze bikerê. Seba ke beşê tewr dezavantajî cinî û tut ê. Seba nê zî destê ma ra bêro ma do çalakîyê wina organîze bikerê. Bi rastî yew projeyê tewr pîl yê şaredarîya ma zî oyo ke xebatê bi nê rengî bîyarê taxan. Semedo ke cinî û tutî est ê ke nêeşkenê şêrê wareyê kay û sînema."

 

'Ma her cinîya ke bêwayîr vejîyenê'

 

Nazmîye wina vat: "Dimayê ke ma şaredarî bi dest kerd, ma dî ke cinîyê ke ameyî şaredarî û ma reyde sohbet kerdî, xeylêk keyfweş bî û şaredarî bi hêzêr vejîyayî. Semedo ke verê çîyêk seba cinîyan çinbî. Sey ke ku qeza û şaredarîya Tûşbayî de cinî çinîbê. Dimayê ke ma ameyî, ma sey endamê Meclîsê Şaredarîye her cinîyêke reyde bi hawayêkê ferdî dayîşûgirewtiş kerd û her yew înan da arasteyê yewîneyê pêwendîdar kerd."