WAN- Yasemîn Kardaş ke seba lazimîyê mektebî yê di tutanê xo 2 hezar û 270 TL xerc kerd, wina vat: “Tutê ma nêşinê mektebê taybetî, şinê yê dewlete. La ma her çî gênê. Mekteb de tena kitabî bêpere yenê dayîş.”

 

Bi abiyayîşê mekteban dayîş û girewtiş zî dest pêkerd. Krîzê ekonomî ke tesîr serê pêro hetê cuye kerdo, şîyayîşê kirtasîye de zî xo mojneno. Roj bi roje malzemeyî vay benê û goreyê serra vîyarte cîyayîyêk pîl est o. Keyeyî pêwa pêro vayîyan seba lazimîyê tutanê xo bigîrê, hewl danê la çi heyf hewldayîş qîm nêkeno.

 

Yasemîn Kardaş ke di tutê aye wendekar ê, ma aye dir şî dayîş û girewtişî û ma her çî cayê ci de dî.

 

Keyeyî nêeşkenê lazimîyê tutanê xo bigîrê

 

Yasemîna ke ma aye dir şî dayîş û girewtiş dîyar kerd ke vayî goreyê parî xeylêk virazîyaya û vat: “5 defterî xeylêk vay ê. Lazimî tenê defterî nîyê. Di wendekarê mi est ê. Mi seba herdiyan zî nîme malzemeyî girewtê. Tutê min o pîl şino sinifa 7ine. Ganî mi 6 defter bigirewtêne la heta nika mi 2 heb girewtê. Tutanê xo yê bînan rê zî mi tena defter girewtê. Çente, qelemê boyaxinî mi nêgirewtî. 5 defter, qelem, ferheng, malzemeyê bînî bi 700 TL girewtî.”

 

‘Cil û belgê di wendekaran rê mi 2 hezar û 300 da’

 

Yasemîne dewam de wina vat: “Goreyê emrî mabêne  cil û belgan de cîyayî est a. Yew şino sinife 7ine, o bîn şino sinife 3ine. Ma seba her diyan bi 2 hezar û 300 TL cilî girewtî. Serra vîyarte ma bêkêmî her çî girewt û ma bi 500 lîra temam kerd. Emser mi nêzdîyê 3 hezarî xerc kerd. La emser pêwa ke ma çîyêk nêgirewto zî 3 hezar şî. Goreyê serra vîyarte 2 hezar û 470 lîra ferq est o.”

 

‘Ganî MEB lazimî bido’

 

Yasemîne wina qedêna: “Tutê ma nêşinê mektebê taybetî, şinê yê dewlete. La her çî ma gênê. Tena kitabê dersan yenê dayîş. Ganî Wezaretê Milî yê Perwerdeyî  (MEB ) cil û belgê ferz, şîyayeyê mektebî peyda bikerê.”