Mîdye Miqted

 

ŞEHBA - Îdarekarîya Meclisê Wargehê Berxwedan ê Multecîyan Kifyet Koto derheqê rewşa wargehê ke koçberê Efrînî ci de têkoşînê cuye danê wina vat: ”Nika wargehan de hêrişê dewleta tirkan û ablûqakerdişê hukmatê Şamî dewam keno. Labelê pêwa zehmetiyan zî xoverdayîşê koçberanê Efrînî zî dewam keno.”

 

Adara 2018ine de dewleta tirkan û komê girêdayeyê aye bajarê Efrînî kerd binê kontrolê xo û netîce de bi hezaran kesî mecbûrê koçî yê kantonê Şehbayî bîyî.

 

Îdarekarîya Meclîsê Wargehê Berxwedan ê Multecîyan Kifyet Koto qalê rewşa peyîn yê wargehî kerd.

 

Bi zorî koçberê kantonê Şehbayî bîyî

 

Îdarekarîya Meclîsê Wargehê Berxwedan ê Multecîyan Kifyet Koto qalê rewşa peyîn yê wargehî kerd û vat: "Dimayê ke bajarê Efrînî ame îşxalkerdiş bi zor koçberê kantonê Şehbayî bîyî û tîya pêwa nêbîyayîşê îmkananê ma wargehî seba koçberan awan kerd. Labelê tîya rewşa cuye zehmet a. Sebebê tewr pîl ê nê zehmetîyan hêrişê dewleta tirkan a îşxalkere nê herêman ser o. Wargehê koçberan zî para xo nê hêrişan ra gênê."

 

'Ambargoyî dir rewşe aloztir bena'

 

Kifyete de dewam de wina vat: "Pêwa hêrişê domdar ê dewleta tirkan û ambargoyê hukmatê Şamî yê giran oyo ke 7 serran dewam keno, ancî zî şar xo ver dano. Seba nê ablûqayî pêro lazimîyê cuye bi pereyê vayî yenê kerdiş û rotiş. Sewbîna awa ke hetê rêxistina UNICEFî ra seba nê kampan ameyîne zî ameye birnayîş û awe binê erdî û bîran ra yena vetiş la seba awe hende pak nîya, xeylêk nêweşîyan xo dir viraznena. Çîyo tewr zor oyo ke wexto nê nêweşî derbazê nêweşxaneyî benê, dermanê ke wazenê seba ablûqa est o peyda nêkenê."

 

'Ma do xoverdayîşê xo pîya dewam bikerê'

 

Kifyete tewr peyîn wina vat: "Nê rêxistinê ke bi nameyê pawitişê heqê merdiman veng danê, çira seba koçberê Efrînî bi wezîfeyê xo yê merdimayî nêwurzenê? Wa bi çimeyê sereyê xo nê nêheqîyê ke derheqê şarê ma de yeno kerdiş bivînê û çareyêk birnayîşê awe rê peyda bikerê. Seba eke awe çinbo cuye vindena. Heta ma ra yeno ma zî bi wezîfeyê xo wurzenê derbazê mîyanê keyeyanê xo benê û înan dir dejê înan pare kenê. Tena seba ma xoverdayîşê xo pîya dewam bikerê û agêrê serê cayî û wareyê xo ma têkoşîn bikerê."