COLEMÊRG- Hemsereka ÎHDyî ya Colemêrgî Sîbel Çapraz derheqê tecrîdê giran yê Îmraliyî û rewşa tepişteyanê nêweşan ê giranan de qisey kerd û vat: "Eke ewro şar vajo serekê ma Abdullah Ocalan o, ganî îqtîdar zî Îmraliyî muxatab bigîro. Ma venga wezîrê dade kenê ke wezîfeyê xo ca bîyarê."

 

Hemsereka Komeleya Heqê Merdiman (ÎHD) ya Colemêrgî Sîbel Çapraz derheqê tecrîd û rewşa tepişteyan de ercnayîş kerd.

 

 ‘Tecrîdê Îmraliyî peynî bibo do ê komelî ser o zî peynî bibo'

 

Sîbele wina vat: "Tecrîd tesîr serê pêro şaran de kerdo. Pêro kuçeyan de yew slogan est o û zî aştî yo. Eke şar vajo Abdullah ocalan serekê ma yo, ganî îqtîdar, Îmraliyî muxatab bigîro. Tecrîdê Îmraliyî bêro wedaritiş do yê serê komelî zî bêro wedaritiş. Îmraliyî ra heta Colemêrg tecrîdêk babeta vatişî ya. Ganî waştişê aştîye yê şarê kurdî ca bîyarê."

 

Sîbele vat, zîndan de 600 ci ra giran hezar û 600 tepişteyê nêweşî est ê û vat: "Bi taybetî tepişteyê nêweşî yê emrê înan pîl yenê tepiştiş. No balkêş o. Abdulkadîr Kuday, Hanîfe Arslan, Suleyman Sabrî Mafî û xeylêk nêweşê bînî yê nêweşî tepişte yê. Gelo kesê ke emrê înan  75-80 do senî yewîya dewlete xira bikerê."

 

'Ganî tepişteyê nêweşî bêrê tehlîyekerdiş'

 

Sîbele tewr peyîn wina vat: “Wexto ke babete bena tepişteyê sîyasî, tu problemî nînê çareserkerdiş. La seba tepişteyanê edlî her tewir îmkan yeno dayîş. Ganî wezaretê edaletî nê bêtêduştî werte ra wedarno. Ma venga wezaretê edaletî kenê ke babeta tepişteyanê nêweşan de wezîfeyê xo ca bîyaro û peynîya tedayan bîyaro."