AMED - Merkezê Tut û Keyeyî yê Zafamanc ê Solîne, tutî û keyeyî heqê xo ra bêpar ameyê verdayîş, peyser gênê û şexsîyetêk xurt vejîyeno werte.

 

11ê Adara 2014ine de taxa Korhat û Kaynartepî ya Rezan ê Amedî de Merkezê Tutan û Keyeyî yê Zafamanc ê Solîne hetê şaredarîya Rezanî ra ame amadekerdiş. Dimayê pratîkê 8 serran ê qeyûmî, şaredarî newe ra kewte destê DEM Partîye û no proje  newe ra ame destpêkerdiş. Merkezê Tut û Keyeyî yê Zafamanc ê Korhatî û Keyeyê Kayî yê Solîne yê Kaynartepe û Hewza Awjenî de xizmet dano.

 

Kordînatora Pêroyî ya Merkezê Tut û Keyeyî yê Zafamanc ê Solîne, Aynur Ozbay Tolucan derheqê xebatan de qisey kerd.

 

Seba tutanê bêîmkanan ware

 

Aynure wina qal kerd: “Ma keyeyê Tutan ê Soline de seba tutan xebate kerd. Ma esasê tut û keyeyî de xebityayî. Odayê kayî est ê. Bi ziwanê dayîke perwerde yeno dayîş. Qursê îngîlîzî, drama, resim, santraç, muzîk û hewza awjenî est ê. Goreyê waştişan ma atolyeyan akenê. Ma rolê cinsê komelî tîya de da roniştiş. Ma 2014ine de Kaynartepe de merkezê xo de hewza awjenî akerd. Tutê kêna û lajî pîya kewtî na hewze. Na gamêka zaf muhîm a. No îmkanêk baş o seba tutan. Eynî wextî de cinî zî kewtî na hewze.”

 

Keyeyê tutan yenê zîyaretkerdiş

 

Aynure dewam de wina vat: “Ma tutê teberê merkezî zî taqîb kenê. Ma ewnîyenê tutî ameyê merkez yan nê? Ma taqîb kenê û persenê çira nêameyê. Ma şinê serdayîşê keyeyan. Wendekarê ma seba ma bi erj ê. Merkez de keye, tutî û mamoste pîya bi paştdayîş xebate kenê. Keye me dir pare kenê ke bi tutanê xo wazenê se bikerê. Ma keye û tutan dir bernameyan viraznenê. Ma hewte û rojanê taybetî qet peygoş nêkenê. Ma şinê muzeyan, kitabxaneyan, sînema, tîyatro û konseran. Keye zî ma dir yenê. No xeylêk muhîm o.”

 

‘Xeylêk projeyê ma est ê’

 

Aynure tewr peyîn wina vat: “Prosesê qeyûman de merkezê ma de binpaykerdişê cidî est bî. Îstîsmar est bî. Demê qeyûman de Merkezê Solîne de seba feydeyê tu çîyêk nêame kerdiş. Zarokîstanan ra bigîrê heta wareyê bînî, pêro sazgehî ameyî vilakerdiş. Dimayê weçînayîşan ma ancî merkezê xo kerd dewre. Tutî û keyeyî zaf keyfweş bîyî. Nika xeylêk plan û projeyê ma est ê. Ma do tutanê xo bîyarê têhet. Do tutî kitabxane de kitab biwanê. Do bi ziwanê xo perwerde bivînê. Ma do her wareyî de tutan dir bêrê têhet.”