Pelşîn Çetînkaya

 

AMED - Cinîyan derheqê qetilkerdişê Narîn Gurane de ercnayîş kerd û vatî, rastî yenê nimitiş û wina vatî: “Tutî mirenê. Şikdarî semedê merdim ê, serê hedîse yena padayîş. No sîstemêk senîn o?”

 

Cinîyan derheqê qetilkerdişê Narîne de fikrê xo vatî.

 

Bîrsen Kurtdogdu reaksîyon mojna û vat: “Sebebê nê polîtîkayê dewlete yê hemverê cinîyan ê. Polîtîkaya bêcezaverdayîşî benê sebebê qetilkerdişan. Agirî de zî Leyla hetê dedê xo ra ameye qetilkerdiş û hedîse bêceza ameye verdayîş. Eynî çî ameye serê Narîne zî. Ceza biameyîne dayîş do Narîne nêameyîne qetilkerdiş. Pêwa cinîyan tutî zî hedef yenê girewtiş.”

 

‘Binê qetilkerdişê Narîne de çîyê lêşînî est ê’

 

Endama Meclîsê Şaredarîya Sûrî Melîha Comert zî wina vat: “Na cografya de bi seyan tutî yenê qetilkerdiş. Desteştişî yenê kerdiş. Ez înan lanet kena. Binê qetilkerdişê Narîne de çîyê zaf lêşînî est ê. Nê çîyê bi xof ê. Weşîya hişê merdimî xira kena. Tutî mirenê, la şikdarî seba merdim ê yenê pawitiş. No sîstemêk senîn o? Wa heqê Narîne bêro pawitiş. Wa edalat bêro. Nê çîyê ke ameyê kerdiş nînê qebûlkerdiş.”

 

‘Komelî ardê sewîyeya rijnayîşî’

 

Endama Meclîsê Cinîyan ê DBPyî Ayşe Çelîkbîlek zî wina vat: “Sîstem hewl dano serê hedîse pado. Qetilkerdişê Narîne de metodêk ke şikdaran paweno est o. Qedexeyê weşanî ardî. Vînîbîyayîşê tutêke qije tesîrê polîtîkayê şerê taybetî mojneno. Ma nika Narîne ser o şinê. No nimûneyêk o. Agirî de zî Leyla wina bî. Mûnzûr de Gulîstane nêameye vînayîş. Çîyê ke yenê kerdiş, netîceya polîtîkaya dewlete yê. Ma dewe û parlamenteran ra vînenê. No fehmê hempar ê HUDA Par û AKPyî yo. Ded, keye û dewêka pîle wazenê serê na hedîse padê, est ê.”

 

Sûcî zêde benê

 

Hemsereka GOÇÎZ-DERî Medya Alkan zî wina vat: “Narîne 19 rojî vînî bî. Pêwa xebatan nêameye vînayîş û tewr peyîn mîyanê torbeyêk de çem de ameye vînayîş. Hende bi rehetî kerdişê nê sûcî, her çî mojneno. Xeylêk nimûneyê winasî est ê. Ganî ma zêde dûr nêşêrê. Çend serrî verê nimûneyê Leyla ame ciwîyayîş. Leyla zî bi eynî hawa ameye qetilkerdiş. No rehetî tesîr xeylêk cayî kerdo. Hewl danê serê hedîse padê.”