MERKEZÊ XEBERAN - TAJÊ bi wesîleya 2yîn serrgera "Jin Jiyan Azadî" eşkerayîye da û vat: “Jin Jiyan Azadî ruhê şorişê cinî yo. Ma venga cinîyan kenê ke bi tekoşînêk hempar hemverê sîstemê camêrd-dewlete sere wedarnê."

 

16ê êlule 2022yîne de cinîya kurde Jîna Emînî Tehran de hetê ‘polîsê exlaqî’ yê Îranî ra ameye qetilkerdiş. Hemverê qetilkerdişê Jîna Emînî bi hezaran şar derûdorê felsefeyê ‘Jin Jiyan Azadî’ de bîyî xelek û herikyayî raşteyan. Pêwa ke serewedaritişê ‘Jin Jiyan Azadî’ vilayê seranserê dinya bî, hema zî dewam keno, zextê rejîmê Îranî yê seba tepisnayîşê serewedaritişî bi rayîrê îşkence, tepiştiş û dardekerdişî dewam keno.Têgêrayîşî Azadîya Cinîyê Êzidî (TAJÊ) seba wesîleya diyîn serrgêra serewedaritişî eşkerayîyêke nuşteyî da. 

 

TAJÊ, vernê de temamê cangorîyê serewedaritişê Jin Jiyan Azadî yad kerd û wina vat: “Ma şexsê Jîna Emînî û Şilêr Resûlî de temamê şehîdê serewedaritişê Jin, Jiyan, Azadî de dinyaya xo bedelnayî, bi heskerdiş û rêzdarî yad kenê. Ma dewleta Îranî ke bi tu hawayî bîyayîş, îrade û nasnameyê cinî nas nêkena, bi şîdet şermezar kenê. Hemverê sîstemê camêrd-dewlete û zîhnîyetê ci de cinî xo ver danê. Oxirê bi destkerdişê azadî de bedelê bi rûmet danê.”

 

Naskerdişê felsefeya Abdullah Ocalanî

 

TAJÊ, bale ant felsefeya Rayberê PKKyî Abdullah Ocalanî ser o û wina vat; “Ma sey cinîyê êzidî dimayê fermanî fikr û felsefeya Rêber Apo nas kerd. Ma azadîya xo fikrê ey de dî. Cinîyê Rojhelatê Kurdistanî û temamê Îranî zî azadîya xo, na felsefe de vînayî. Bi felsefeya Jin, Jiyan, Azadî hemverê zulm û qirkerdişê cinîyan de sere wedarnayî û mîyanê di serran de bedalê zaf giran dayî. Paradîgmaya Rayber Apo azadîya cinî awan kena û koletî ra xelisnena. Eke fikr û felsefeya Rayber Apo nêbo, serewedaritişê cinîyan do dinya hende veng nêda. Seba ke cinî serkêşê komel û cuye ya, coka wexto ke Jîna Emînî Îran de hetê ‘polîsê Exlaqî’ û binê nameyê dînî de ameye qetilkerdiş, ancî bi serkêşîya cinîyan serewedaritiş virazîya û temamê dinya rê vila bî.”

 

'Têkoşîn pîl bikerê' 

 

Têgêrayîşê Azadîya Cinîyê Êzidî, tewr peyîn wina vat, “Ma venga pêro cinîyê dinya kenê, hemverê dinyaya camêrdî de tenê şer û kiştiş est o û bi felsefeya jin jiyan azadî sere wedarnê, qetilkerdişê Jîna Emînî û bi hezaran cinîyê sey aye bikerê sebebê wurznayîş, têkoşîn û xoverdayîşî. Ma xo bi felsefeya Jin Jiyan Azadî bi rêxistin kerd û heyfê fermanî wedarna. Ma venga heme cinîyan û cinîyê Rojhilatê Kurdistan-Îranî kenê ke yewîya xo xurt bikerê, têkoşînê xo hempar bikerê. Ma sey cinîyê êzidî bi ruhê wayîye, bi felsefeya şorişê cinî, Jin Jiyan Azadî vanê, ma do heta peynî hemverê nêheqî, qirkerdiş û zulmî vinderê. Ma bi nê hîsan reyke bîn şexsê Jîna Emînî de temamê şehîdê şorişî jin jiyan azadî bi minet û heskerdiş yad kenê û sozê xo yê pîlkerdişê têkoşînî ancî kenê.”