STENBOL - Cinîyan paştdayîşê "Seba 6284ine seferberî" ke hetê KCDPyî ra ame destpêkerdiş kenê. Cinîyan venga têkoşînê hempar kerd û vatî: "Çîyo ke cinîyan xilas bikero paştdayîş o." 

 

Platformê Ma do Cinayetê Cinîyan Vindarnê (KCDP), 11ê êlule de Merkezê Kulturî yê Nazîm Hikmetî de kombîyayîşê çapemenî de startê xebatê "Seba 6284ine seferberî" da. Temsîlkarê sazgeh û rêxistinê cinîyan, kaybazî, hunermend û xeylêk kesî tewrê kombîyayîşê çapemenî bîyî. 

 

Cinîyê ke tewrê kombîyayîşî bîyî venga tewrbîyayîşê seferberî kerdî û ajansê ma rê qisey kerdî. 

 

'Ma do bi kollektîfî seferberî bikerê'

 

Temsîlkara Federasyonê Femînistê Ciwanî Guneş Akşahîn wina vat: "Ma vînenê ke şîdetê hemverê cinî û tutan û qetilkerdişê cinî û tutan her ke şino zêde beno. Kuçeyan û keyeyan de senî yenê qetilkerdiş, ma vînenê. Seba nê ganî qanûnê 6284ine bêro pratîzekerdiş. La îktîdaro sîyasî bi înat nêkeno. Cinîyê ke verê xo danê qereqolan, reyke bîn verê înan danê keye. Her wareyî de îradeyê cinîyan çin yeno hesibnayîş. Ma bi sazgeh û rexistinê cinîyan seferberîyêk da destpêkerdiş. Ma do na çarçewa de panel û perwerdeyan organîze bikerê. Ma do qeza û bajaran, unîversîteyan de xebatanê xo dewam bikerê. Ma do cinîyan dir bi kollektîfî seferberî bikerê."

 

'Ma do hêz yewbînan ra bigîrê'

 

Kaybaze Ferîde Çetîn, da zanayîş ke sewîyeyêke girîng de nîyê û wina vat: "Ganî ma her ca de qalê 6284ine bikerê. Tîya de heqê qiseykerdişî îqtîdarî nîyo. Muxatab ê nîyê. Ma paweyê her kesî yê. Ma do kuçeyan de vengê xo vejê. Tenê hunermendî nê, ganî roşnvîr, hiqûqnas û ûsn. her kes vengê xo berz bikero. Êdî ma do yewbînan ra hêz bigîrê." 

 

'Ma seba ameyoxê tutan kom benê'

 

Verfeka Partîya Têgêrayîşê Kedkarî (EHP) Ozge Akman wina vat: "Ma bêhuqûqî vînenê, nêtêduştîya hemverê cinî û tutan vînenê, no çî zerrîya ma zaf veşneno. No çî seba pratîzenêkerdişê qanûnê 6284ine yo. Bi serran o cinî seba cuyêka têduşt û azad têkoşînêk pîl serê na cografya de mojnayî. Bi nê  têkoşînî ma heta nê rojan ameyî. Ewro zî seba 6284 seferberî ma ameyî têhet. Ma cinîyê ke seba wedaritişê nêtêduştî û seba ameyoxê tutan kom benê."

 

'Biciwîyo tifaqê cinîyan'

 

Parlamentera Partîya Têduştî û Demokrasî (DEM Partî) ya Amedî Ceylan Akça wina vat: "Ma paştdayîşê qanûnê 6284ine kenê. Çend tifakê camêrdan pîl beno, hende zî ê cinîyan pîl beno.  Seferberîyê ke hetê KCDPyî ameyê destpêkerdiş ewro nîşaneyê pîlbîyayîşê têkoşînê cinîyan o. No çî têkoşînê Têgêrayîşê Cinîyanê Kurdan o. Ça de cinî bibo uca de TJA est o. Xêrcê felsefeya 'Jin jiyan azadî' zîhnîyeto ke cinîyan xilas bikero çin o. Nê semedî ra biciwîyo tifaqê cinîyan."