AMED - Şaredarîya Amedî ya Bajarê Girdî, Parka Cuya Sosyale û Cayê Arisîyayîşî yê qezaya Yenîşehîrî de hewza asnawe yê cinîyan ke tamîr kerde û akerde, 126 cinîyan tira ra îstîfade kerd.

 

Serekîya Daîreya Xizmetanê Cinî û Keyeyan, seba ke hetkarîya îstîhdamê cinîyan biko, hem kursê meslekmusnayîşî hem zî aktîvîteyê sosyalî organîze kena û xizmet dana cinîyan.

 

Şaredarîya Bajarê Girdî, hewza ke Parka Cuya Sosyalî û Cayê Arisîyayîşî yê qezaya Yenîşehîrî de est a û demêko derg bî ke nêameyne xebitnayene, tamîr kerde û seba ke cinî asnawe bimusê bêheq akerde.

 

Programê hewze de verê cinîyê ke Merkezanê Cuya Cinîyan ra îstîfade kenê ame dayene û 126 cinîyî beşdar bîy.

 

Reya verêne şîyê hewze

 

Rengîn Nergîz (23) ke qezaya Sûrî de ciwîyena û beşdarê kursê asnawe bîya, qal kerd ke cuya xo de qet nêşîya hewze yan zî derya. Nergîz va ke a hewte de 2 rojan 8 seansî şîya kursê asnawe û asnawe musaye û wina dewam kerd: "Ma hîrê wayî reya verêne şîyê hewze. Bi musayîşê ke ame dayene mi tersê xo yê awe qedêna û asnawe musaya. Ez wazena ke nê tewir kursî her serre reyna bêrê viraştene û hîna zêde dewam bikerê. Zaf weş bî, ma hem keyf kerd hem zî musayî."

 

'Ez wazena ke kursê asnawe dewam biko'

 

Helîme Nergîz zî va ke a asnawe nêzanayêne û bi nê kursî demêko kilm de asnawe musaya. Nergîz wina va: "Ez zaf lez asnayîş musaya. Seba ke ez hîna profesyonel asnawe bikerî ez wazena ke kurs serrna reyna bêro akerdene. Zanayîşê asnawe hîsêko zaf weş o."

 

'Mi şans dî de ez cinîyanê taxe bişinasna’

 

Hatîce Sayan ke qal kerd ke a hema 9 serre bîya kewta çala awe ro coka tersê aye yê awe est bî, wina va: "Ez bi panîk kewta awe. Nefesê mi birîyayêne. Vervajîyê asnawe, mi bawer nêkerdêne ke ez eşkena tersê xo biqênêna. Mamosta cesaret da mi. Mi dest pêkerd tersê mi qedîya. Ez eşkaya binê awe de nefesê xo bitepêşa. mendişî binê awe hîsêko zaf weş bî. Badê ke ez asnawe musaya, mi cinîyanê bînan ra zî ke waştêne asnawe bimusê, ardim kerd."

 

Hatîce, îfade kerd ke heme rojê aye kar û xizmetê keyeyî de vîyarenê û wina dewam kerd: "Bi nê kursî mi şansê naskerdişê cinîyanê taxe dî. Mi embazê neweyî viraştî. Ez fikirîyena ke gedeyanê xo zî asnawe bimusna.”