Mîdye Miqted

 

ŞEHBA - Cinîyê Efrînî yê ke bi darê zorî koçber bîyî û hemverê hêrişan de xoverdayîşê înan dewam keno wina vatî: “Çi beno wa bibo ma fek herra xo ra vera nêdanê û wareyê xo ra vera nêdanê û ma hemverê dişminî de teslîmkerdişî tesdîq nêkenê. Ganî sazgehê mîyandewlete ke venga pawitişê heqê merdiman kenê ke wayîrê wezîfeyê xo vejîyê û bêvengî ra xo xilas bikerê."

 

'Cinî, tutî benê qurbanîyê nê hêrişanê hovî'

 

Emîne Silêmana efrînîje dîyar kerd ke hêrişê dewleta tirkan û komê girêdayeyê aye yê serê temamê Rojawanê Kurdistanî dewam kena labelê têkoşînê înan zî dewam keno û wina vat: "Bi 7 serrî yo ke ma koçber bîyê. Xeylêk hêrişî serê ma de yenê kerdiş. Cinî, tutî benê qurbanê nê hêrişanê hovî. Coka ma eşkenê vajê ke çîyo ke ma tîya ciwîyenê, wexto ke ma Efrîn de wextê şerî de ciwîyayîne, dûrî nîyo."

 

'Dewleta tirkan wazena ma Şehba de veng bikero'

 

Emîne wina vat: "Kantonê Şehbayî de îmkanê cuye xeylêk kêmî yo, astengî û zehmetî vernî de yo la xoverdayîşo bi rûmet û pîl dewleta tirkan rê beno tersêk. Dewleta tirkan wazena ke ewro şarê tîya xo ver danê, ancî berê koçberîye abikero. Dewleta tirkan bi hêrişê xo wazena, kantonê Şehbayî ke ma bi gonîya xo, destê terorê DAÎŞî ra xelas kerd, veng bikerê labelê koçberê Efrînî bi hêvîyêke pîlî ciwîyenê ke do reyke bîn agêrê serê herre û wareyê xo, emrê xo yê ke mendo uca de dewam bikerê."

 

'Her roje nê koçberê bêgunayî hêrîşan reyde rî bi rî manenê' 

 

Derheqê eynî babete de koçbera Efrînî Hemîde Umar zî nêrazîbîyayîşê xo mojna û vat: "Şehba de her roje hêrişî virazênê. Her rey sivîlî benê hedef, her roje nê koçberê bêgunay hêrîşan reyde rî bi rî manenê. Tewr zêde qezaya Şêrewa ya kantonê Efrînî û qezaya Tilrifatî hedef yena girewtiş labelê nê hêrişî sewîyeya  hedefgirewtişê mal û kesan de nêmend, eynî wextî de dest bi qirkerdişî zî ame kerdiş. Hemverê nê hêrişan de ma do tim xo ver bidê."

 

'Ma fek wareyê xo ra vera nêdanê'

 

Hemîde dîyar kerd ke ê do teslîmbîyayîşî tesdîq nêkerê û wina vat: "Çi beno wa bibo ma fek herra xo ra vera nêdanê û reyke de ma hemverê dişminî teslîmkarî tesdîq nêkenê. Ganî sazgehê mîyandewletî ke venga pawitişê heqê merdiman kenê wayîrê wezîfeyê xo vejîyê û bêvengî ra xo xelas bikerê.”