WAN - Endama Meclîsê Şaredarîya Rêya Armûşî Oznur Evîn derheqê xebatê cinîyan de qisey kerd û vat: “Ma taxa xo de bostanê bajarî yê cinîyan awan kerd. Ma bi nê bostanî, cinîyan herre dir anê têhet û ûca de komelbîyayîşê cinîyan laver benê. Merkezê paştdayîşê cinîyan dir zî ma do xeta têkoşînê hemverê cinî de awan bikerê.”

 

Endama Meclîsê Şaredarîya Rêya Armûşî Oznur Evîn, proje û xebatê şaredarîye yê seba cinîyan qal kerd.

 

‘Xeylê sazgehî amebî padayîş’

 

Oznure dîyar kerd ke wexto ke newe şaredarî girewtê, pêro sazgehê cinîyan hetê qeyûman ra amebî padayîş û vat: “Pêro raşteyê cinîyan bêtesîr amebî verdayîş. Ma seba nê kewtî têgêrayîş. Ne Merkezê Cuye yê Cinîyan ê Maya ancî kerd falîyet. Wareyê bîn yê amebî padayîş ma akerd.”

 

‘Derheqê tîryakî de semîner’

 

Oznure dîyar kerd ke çarçewaya têkoşînê tîryakî reyde xebatan kenê û wina vat: “Babeta tîryakî de wareyê cinîyan de ma 50 keyayî reyde semîner da. Semîneran de derheqê babetê tîryakî, tewirê ci senîn ê, senî eşkeno bêro çareserkerdiş, xebatê senîn ganî bêrê kerdiş de munaqeşe ameyî kerdiş û agahî ameyî dayîş.”

 

Binê banê şaredarî de kreşê tutan

 

Oznure dîyar kerd ke plansazîyê înan yê ke binê banê şaredarî de kreş abikerê û wina ercna: “Ma do nê kreşî aşmêke de abikerê. No projeyê ma do seba cinîyê ke wazenê tewrê cuya ekonomî bibê xeylêk rehet bo.  Sewbîna ma do xeta têkoşînî hemverê şîdetî awan bikerê. No zî do aşmêke de bikewo falîyet. Armancê nê projeyî oyo ke binê şîdetî de yê xo biresnê ma. Ma na xebate hemkarîya şaredarîya Bajarê Girdî ya Wanî dir kenê. Sewbîna do bernameyê seba tutan taxan de pê bêrê.”