AMED - ATKyî raporo ke Serdozgerîya Komare ya Amedî neql kerd de dîyar kerd ke Narîn Gurane ameya xeniqnayîş. 

 

Narîn Gurana 8 serrî roja 21ê tebaxe dewa Çûlîya ke serê qezaya Rezanê Amedî de ya, ameye vînîkerdiş. Dimayê 19 rojan cenazeya aye verê çemî de ameye vînayîş. Sazgehê Tibê Edlî yê Stenbolî raporê ke derheqê kiştişê Narîne de amade kerd, Serdozgerîya Komare ya Amedî rê şirawit. Raporo ke hetê 1ine Heyetê Îhtîsasî yê Sazgehê Tibê Edlî ra bi ercnayîşê belgeyê tibê edlî û raporê otopsîyê derheqê Narîn Gûrane de ameyo amadekerdiş de, nê çî ameyî vatiş: "Bi dayeyê bîyaye dir ercnayîşê doktorî ke Narîn Guran gelo îstîsmarê cinsî dir rî bi rî menda yan nê, nêameyo kerdiş.” Rapor de ame dîyarkerdiş ke mergê Narîne roja vînîbîyayîşê aye (21ê Tebaxê) pê ameyo.

 

Binê çok û cêrê lingê çepe yê Narîne tira bîyo. Rapor de ame vatiş ke beno dimayê mergî, hetê heywanan ra ameya tirakerdiş. Sewbîna bi zafvengî muala ameyo kerdiş û tespîtkerdiş ke Narîn Guran netîceya xeniqnayîşî yanî bêoksîjenmendişî de ameya kiştiş. 

 

Sazgehê Tibê Edlî, rêça gazkerdişî yê milê kekê Narîne, Enes Guran ser o cigêrayîşê xo dewam keno û yeno pawitiş ke sazgeho mîyanên mutalayê xo bido.