STENBOL - Hemsereka Komeleya Cigêrayîşî yê Kurdî Remzîye Alparslan, bale ant sereştişê MED-DER, Kooperatîfê Perwerdeyê Ziwan û Hunerî yê Ankayî û Payîz Pirtûkî ser û vat: "Hewl danê ke bi tedayan ziwan û nasnameyî werte ra wedarnê. La ma do zî bi têkoşîn hemverê tedayan vejîyê, wayîrê ziwan, nasname, kultur û erjê xo vejîyê."

 

Çarçewaya cipersayîşê Serdozgerîya Komare ya Amedî daya destpêkerdiş de polîsan vizêr eşt serê Komeleya Cigêrayîşî yê Ziwan û Kulturê Mezopotamyaye (MED-DER), Kooperatîfê Perwerdeyê Ziwan û Hunerî yê Ankayî û Payîz Pirtûkî û mîyan de îdarekar, mamoste û xebatkarê sazgehî zî ci de komî de 25 kesî ameyî destbendkerdiş. 

 

Destbendkerdiş û sereştişê sazgehê Kurdistan û Tirkîya bi çalakîyan ame şermezarkerdiş. Derheqê babete de Hemsereka Komeleya Cigêrayîşî ya Kurdî Remziye Alparslan ajansê me JINNEWSî rê qal kerd. 

 

'Wazenê pêro wareyê cuye asteng bikerê' 

 

Remzîye, destpêk de bale ant tedayê ziwanî ser o û vat: "Erzîya komeleyê ke perwerdeyê bi kurdkî danê û cayê ke kitabê bi kurdkî yenê rotiş. Hêrişê komele û kesan kenê. Hêrişê dewlete yê hemverê komeleyê ke bi kurdî perwerde danê zêde benê. Na polîtîkaya dewlete çarçewaya nêçareserîyê problemê kurdî de yeno kerdiş. Semedo ke nêwazenê problemê kurdî çareser bikerê. Dewlete nêwazena şarê kurdî kultur, ziwan û ercê xo bido ciwîyayîş. Wazenê pêro wareyê cuye kurdan rê asteng bikerê." 

 

'Çira ma bi ziwanê xo xo îfade nêkenê?'

 

Remzîye dewam de wina vat: "Her wareyê cuye de dewlete hewl dana ke ziwanê kurdkî asteng bikero. Ganî ma rayîr nêdanê nê çî, nêverdê ke ziwanê kurdkî bêro krîmînalîzekerdiş û werte ra bêro wedaritiş. Şarê kurdî ganî her ca de wayîrê ziwanê xo vejîyo, wayîrê bîyayîşê xo û herra xo vejîyo. Ganî şar  wayîrê sazgehê xo yê ke bi kurdî perwerde danê vejîyê. Lazimî bi paştdayîşî û têkoşînî est o. Sewbîna ma çira ziwanê xo baş nêzanê? Çira ma bi ziwanê xo nêeşkenê îfade bikerê?"

 

'Do xoverdayîş dewam bikero'

 

Remzîye tewr peyîn wina vat: "Ganî şarê kurdî hemverê polîtîkayê hêriş, zext û pelçiqnayîşî de sere nêtewênê. Ganî êdî statuyê kurdan, bîyayîşê kurdan û waştişê kurdan bêrê qebûlkerdiş. Lazim o ke şarê kurdî waştişê xo êdî bi israr û bi vengêk berz bîyarê ziwan. Ça teda bibo, ganî uca de veng bêro berzkerdiş. Ez destbendkerdiş û sereştişê sazgehan şermezar kena. Şarê kurdî her tim xo ver dayo û do bido zî.”