STENBOL - 13ê teşrîna verêne de do Amed de mîtîng pê bêro. Cinîyan seba mîtîngî veng da û vatî: “Heme kesê aştî wazenê ganî mîtîng de bê. Hemverê nê sîstemî de ma azadî biqîrê.”

 

Platformê Sazgehê Demokratîke çarçewaya kampanyaya ‘Abdullah Ocalan rê azadî problemê kurdî rê çareserîya demokratîke’ de do 13ê teşrîna verêne de Amed de bi şîarê "Ma hemverê komployî xo ver danê, seba azadîye Amed de yenê têhet"  mîtîngê pîl pê anê. Xebatê seba mîtîngî dewam kenê. Yeno pawitiş ke Stenbol tewrbîyayîşêk pîl bibo. Hemsereka Komeleya hetkarîya bi Keyeyê Tepişteyanê Marmarayî (MATUHAY-DER) Dîlek Sonmez û hemsereka Komeleya Paştdayîşî û Hetkarîya Kesê Merdimê Xo Antolya de Vînî kerdê (ANYAKAY DER) Emîne Arslan derheqê mîtîngî de qisey kerd.

 

‘Ma bîyayîşê kurdan bidê eşnawitiş’

 

Dîlek Demîr da zanayîş ke amancê mîtîngê Amedî, peynîkerdişê tecrîdê serê Rayberê PKKyî Abdullah Ocalanî û azadîya ey ya fizîkî yo û wina vat: “Tecrîdê Îmraliyî tesîr serê pêro zîndan û komelî kerdo. Lazimîya Tirkîya bi aştîye est a. Ganî aştî bi dîyalogî pê bêro. Ma seba azadîye serê lingan de yê. Ma do bîyayîşê kurdan bi sîstemî bidê eşnawitiş.”

 

‘Ma do têkoşîn dewam bikerê’

 

Dîleke deeam de wina vat: “Eke ma aştîye biwazê girîngîyê nê mîtîngî tîya vejîyeno werte. Tecrîdêk giran serê Birêz Abdullah Ocalanî de est o. Azadîya Abdullah Ocalanî, azadîya şarê kurdî ya. Rayberê Şarê Kurdî, bi komployêk ame tepiştiş û Îmraliyû de tepişyeno. Bi serran o tu agahî ci ra nîna girewtiş. Şarê kurdî polîtîkayê înkar û îmha dir rî bi rî yo. Ma têkoşînê xo bi israr dewam kenê. Eke têkoşînê demokrasîyê hempar bêro kerdiş, do serkewtiş pê bêro. Tecrîd tesîr serê her hetê komelî kerdo. Ma do Amed de mîtîng de aştî û azadî biqîrê. Ma her kesî dawetê mîtîngî kenê. Ma 13ê teşrîna verêne Amed de bê.” 

 

‘Ma bi ruhêk pîl xo amade kenê’

 

Hemsereka ANYAKAY DERî Emîne Arslan zî wina vat: “Ma çarçewaya xebatan de koordînasyon awan kerd. Ma taxe bi taxe, keye bi keye xebatan kenê. Xebatê ma bi hawayêk xurt dewam kenê. Ez bi bawerî, kelecan coşêk pîl xebatanê xo kena. Xebatê ma heta roja peynî do dewam bikerê. Ma bi ruhêk pîl xebatan kenê. Ma do pîya serkewte bê. Ma do pîya awan bikerê. Ez venga pêro kesî kena ke 13ê teşrîna verêne de Amed de bê.”