Rozerîn Gultekîn

 

STENBOL - Komîteyê Wezîran, qerarê ‘binpaykerdişî’ ke DMMEyî derheqê Rayberê PKKyî Abdullah Ocalanî de dabî 10 serrî dima kerd rojeva xo û derheq de qerarê mabêne da. Avûkata Buroyê Huqûqî yê Asrinî Raziye Ozturk derheqê babete de qisey kerd û vat: “Heqê hêvîye yê hezaran yeno munaqeşekerdiş. Sekreterya pêşnûmeyê qerarê  mabêne amade kena. Hetê sîyasî de, hetê ekonomî de caardişî eşkenê bibê. Seba qerarê 10 serrî pê nêameyo, ganî gamê bi tesîr bêrê eştiş.”

 

Dadgeha Heqê Merdiman ê Ewropaye (DMME) 18ê adara 2014ine de cezaya muebbetê giran ê bê heqê veradayîşê bi şertî yê Rayberê PKKyî Abdullah Ocalanî rê ameya birnayîş, seba “Heqê hêvîye” sey binpaykerdişê Peymana Heqê Merdiman ê Ewropayî (PMME) qebûl kerd. DMMEyî zî Tirkîya waşt ke qanûnê xo sererast bikerê. DMMEyî dima ra zî seba Hayatî Kaytan, Emîn Gurban û Civan Boltan eynî qerar da. Serê qerarî dir 10 serrî derbaz bî la Tirkîya hema zî tu game nêeşta.

 

Dewamê komployê mîyanneteweyî…

 

Razîye vat, 25ê Adara 2021ine heta nika Abdullah Ocalan û muvekîlê xo yê bînî yê Îmraliyî agahî nîgênê û vat: “Seba sazgeh û dezgehê wezîfedar berpirsyarîyê xo ca nêanê, tecrîd ewro dewam keno. CPT hema rapor eşkera nêkerdo. Dosyayêke DMME 2011ine de dewam keno est o. La komîteyê wezîran na babete de bi lez tênêgêrayî. Seba nê zî tecrîd dewam keno. Tecrîd ma zanê ke girêdayeyê komployê mîyanneteweyî yo.”

 

‘Nika heqê hêvîye yê hezaran yeno munaqeşekerdiş’

 

Razîye wina dewam kerd: “Qerarê mabêne, nêzdîbîyayîşêk pozîtîf bo zî qerarêk erey mendo yo û vat: “Sererastkerdişê qanûnî yê pê bêro do tesîrê hezaran tepişteyê ke cezaya muebetî girewtê tesîr bikero. Nika heqê hêvîye yê hezaran kesî yeno munaqeşekerdiş. Nika her cayê dinya de seba azadîya fîzîkî ya Abdullah Ocalanî çalakî dewam kenê. Netîceyê tedayê cidî yê STK û komelî de Komîteyê Wezîran qerar berdê rojeva xo. Na babete pêro komelî eleqeder kena.”

 

Goreyê pêşnûmeyê qerarê mabêne eşkeno ceza bêro dayîş

 

Razîye qalkerdişê xo wina qedêna: “Sekreterya, do mabênêke pêşnûmeyê qerarî amade bikero. Xeylêk metodî ci de est ê. Hetê sîyasî de caardişî, hetê ekonomî de zî caardişî eşkenê bibê. Beno ke dosya newe ra seba DMMEyî bêro şirawitiş la seba dosyayêke ke lazimî bi sererastkerdişê qanûnî heye, lazimî bi tespîtkerdişî reynayê ci çin o. Hetê qerarê ke 10 serrî yo pê nêameyê de hewce bi game bi tesîr est o.”