STENBOL - Avûkatanê Buroyê Huqûqî yê Asrinî CPTyî dir pêvînayîş kerd, dîyar kerd ke serdayîşî de raporê derheqê serdayîşê Îmraliyî ardê rojeve û waştê ke CPT şêro pêvînayîşêk newe bikero. 

 

Rêberê PKKyî Abdullah Ocalan 25 serrî yo Zîndanê Tîpê Fyê Asayîşê Berzî yê Girawa Îmraliyî de yeno tepiştiş. Abdullah Ocalan 43 aşmî yo tecrîdêl giran dir rî bi rî to û tu agahî ci ra nîna girewtiş. Avûkatanê Buroyê Huqûqî yê Asrin ke mudafîtiyê Abdullah Ocalanî kenê, seba pêvînayîşî mîyanê hewldayîşî û têkoşînî de yê. Avûkatê Abdullah Ocalanî bi Komîteya Vernîgirewtişê Îşkenceyî yê Ewropayî (CPT) û Meclîsê Parlamenteran ê Konseya Ewropayî dir pêvînayîş kerd. 

 

Avûkatanê Buroyê Huqûqî yê Asrinî ra Îbrahîm Bîlmez derheqê pêvînayîşî de Ajansê Mezopotamya (MA) rê qisey kerd. Îbrahîmî dîyar kerd ke înan pêvînayîşê CPTyî dir dîyar kerdê ke “tecrîd ameyo sewîyeyêk ke nîno tehamûlkerdiş.” Îbrahîm vat, înan heyetê CPTyî rê neql kerdê ke nimûneyê sîstemê tecrîdê Îmraliyî tu cayê dinya de çin o û vat: “Eynî wextî de ma CPTyî ra vat ke ganî şima raporê xo yê amadekerde eşkera bikerê. Her çiqas rapor eşkera kerdî zî la 2 serrî ser ra derbaz bîyo û seba nê ma CPTyî ra waşt ke lezkî şêro serdayîşê Îmraliyî.” 

 

Îbrahîmî bale ant serê çîyê ke CPT înan rê ardo ziwan û wina vat: “Heyetê CPTyî dîyar kerd ke ê serra 1999ine ra Îmraliyî dir nêzdî ra eleqedar benê. Ma ra vatî ke seba ê tecrîd wedarnê her tim hukmatê Tirkîya dir mîyanê dayîşûgirewtişî de yê. Sewbîna seba raporê vatî bê tesdîqkerdişê Tirkîya ê nêeşkenê rapor eşkera bikerê, la seba ke tesdîqkerdişê Tirkîya bigîrê, mîyanê hewldayîşî de yê.”