STENBOL - Xoverdayoxa Polonezî Yasemîn Sayin ke yew 146 karkerê ke seba bî sendîkayîje û kar ra ameye eştiş wina vat: “Ma heqê xo gêrayî. Vatî ‘şima rayîrê şaşî de yê’. Ma nêtersenê. Ma sere nêtewênenê. Cinî fek wareyê xoverdayîşî ra vera nêdanê.

 

Karkerê Fabrîkaya Xidayan ê Polonez ke sermayeyê ci yê Urdun o û qezaya Çatalca yê Stnebolî de yo, seba şert û mercê xirabî, kêmbîyayîşê meaşî bîyî endamê Sendîkaya Tekgida-Îşî. Nê ser de karkerê ke bîyî endamê sendîka, kar ra ameyî eştiş. Karkerî şîyî çalakîya vindarnayîşê karî zî kar ra ameyî eştiş. 146 karkerê ke bi Kod-46 bê tazmînat kar ra ameyî eştiş, verê fabrîkayî de dest bi çalakî kerdî. Karkerî bêrê destbendkerdiş zî şîdet bêro kerdiş zî xoverdayîş dewam keno.

 

‘Ma heqê xo gêrayî û ma eştî teber’

 

Xoverdayoxa Polonezî Yasemîn Sayin dîyar kerd ke seba şert û mercê nêbaşî bîyê endamê sendîka û wina vat: “Meaşê ma kewtêne û ma nêeşkayîne debara xo bikerê. Ma bî endamê sendîka. Hewteyê vernîya ke ma dir qisey bikerdêne, nîmeyê şewe de mesaj şirawitî û ma kar ra eştî. Sûcê ma çinîbî. Ma heqê xo gêrayî. Ma eştî verê berî. 17 hezar meaş dayîne ma la di hezar ci ra birnayîne. Ma vatêne şima çira birnenê? Vatêne dewlete birneya. 5 tutê mi est ê. Ez senîn bi 15 hezarî debare bikerî? Ma zam waşt nêdayî ma. Ma zî bî endamê sendîka. Bi mesayîyê mîyanê hewteyî û xebata peyîn ya hewteyî de 19 hezar dayîne. 6 serrî yo ez tîya şuxilîyayîne. Lajê mi zî serrêke û nîm bî tîya şuxilîyayîne. Ma her diyan zî kar ra eştî.

 

‘Tehdîdê ‘şima rayîrê şaşî de yê’

 

Yasemîne tewr peyîn wina vat: “Karkeran sey kole şuxilnenê. Mobîng pê anê. Badê ke ma bî endamê sendîka vatî, ‘şima rayîrê şaşî de yê, do sereyê şima şêro, şima xo rêxistin kerdo’. Ma zî vat, ma heqê xo gêrenê. Vatî ma se ra 25 zam kenê û îkramîye danê. La ma qebûl nêkerd. Ma 146 kesî kar ra vetî. Mîyanê nê karkeran de yê ke 20 serrî yo şuxilîyayîne est bî. Polîsan ma bi kelepçe destbend kerd. Çira ma destbend kenê? Ma kesî nêkişto, ma dizdî nêkerdo. Ma heqê xo gêrenê. Cinî fek xoverdayîşî ra vera nêdanê. Ma nêtersenê. Ma sere nêtewênenê. Heta ma heqê xo nêgîrê, ma do têkoşîn dewam bikerê.”